ن لیگ مولانا کو منانے سے پہلے بڑے میاں کو منائیں: حافظ حسین احمد

ہم کسی کی ماننے نہیں بلکہ اپنی بات منوانے کے لیے میدان میں نکلے ہیں،رہنما جمعیت علماء اسلام

پیر 22 اپریل 2024 18:10

کراچی /کوئٹہ(اُردو پوائنٹ اخبارتازہ ترین - این این آئی۔ 22 اپریل2024ء) جمعیت علماء اسلام کے سینئر رہنما و سابق سینیٹر حافظ حسین احمد نے رانا ثناء اللہ کے بیان پر رد عمل دیتے ہوئے کہا کہ مسلم لیگ ن مولانا صاحب کو منانے سے پہلے بڑے میاں کو منائیں، ہم کسی کی ماننے نہیں بلکہ اپنی بات منوانے کے لیے میدان میں نکلے ہیں جے یو آئی سول بالادستی کے مطالبے پر میدان میں نکلی ہے ، مسلم لیگ ن موقع پرست جماعت ہے جب مشکل میں ہوتی ہے تو گلے سے لگاتی ہیں اور جب مشکل سے نکل جائے تو گلے پڑ جاتی ہے۔

اپنے ایک بیان میں حافظ حسین احمد کا کہنا تھا کہ رانا ثناء اللہ کہتے ہیں کہ ہم مولانا فضل الرحمن کو منانے کی کوشش کریں گے رانا صاحب آپ ہمیں چھوڑیں پہلے اپنے بڑے میاں کو منائیں وہ سب سے زیادہ ناراض ہیںکیوں کہ نوازشریف کے چوتھی بار وزیر اعظم بننے کا خواب مسلم لیگ ن نے ہی چکنا چور کیا۔

(جاری ہے)

انہوں نے کہا کہ کوئی رانا ثناء اللہ سے پوچھے کہ آخر میاں نواز شریف کے وزیر اعظم بننے میں کون رکاوٹ تھا ایسے حالات کس نے پیدا کئے کہ بڑے میاں کے بجائے چھوٹے میاں کو وزیر اعظم بنایا گیا یہ کوئی عام سی بات نہیں بلکہ اسی سوال میں سب جواب چھپے ہوئے ہیں ۔

شہباز شریف ’’اُن‘‘ کے اتنے فرمانبردار ہیں کہ اپنے ہی محسن کے پیٹ میں چھرا گھونپ دیا درحقیقت مسلم لیگ ن اپنے محسنوں سے دغا کرنے میں کبھی دیر نہیں کرتی۔