اسپیکر قومی اسمبلی کا ایوان میں فوج اور عدلیہ کیخلاف تقاریر روکنے کا فیصلہ

پارلیمنٹ کی کارروائیوں میں ایجنسیوں کا کوئی کردار نہیں، کسی ایجنسی کے کہنے پر کوئی میٹنگ منسوخ نہیں ہوتی، سر دار ایاز صادق

جمعہ 20 ستمبر 2024 19:45

اسپیکر قومی اسمبلی کا ایوان میں فوج اور عدلیہ کیخلاف تقاریر روکنے کا ..

اسلام آباد (اُردو پوائنٹ اخبارتازہ ترین - این این آئی۔ 20 ستمبر2024ء) اسپیکر قومی اسمبلی ایاز صادق نے ایوان میں فوج اور عدلیہ کیخلاف تقاریر کو روکنے کا اعلان کردیا۔میڈیا سے گفتگو میں اسپکر قومی اسمبلی ایاز صادق نے واضح کیا ہے کہ قومی اسمبلی میں فوج اور عدلیہ کے خلاف تقاریر روکی جائیں گی، آئین میں بھی لکھا ہے کہ عدلیہ اور مسلح افواج کے خلاف بات نہیں ہو سکتی، عدلیہ اور فوج کے خلاف تقاریر نشر نہیں ہوں گی۔

مجوزہ آئینی ترامیم سے متعلق گفتگو کرتے ہوئے ایاز صادق نے کہا کہ سیاسی جماعتوں نے آئینی ترامیم سے متعلق یقین دہانی کروائی ہوگی تبھی تو حکومت نے اجلاس بلایا ہوگا کہ چلیں ایک آدھی تو ترمیم منظور کروا ہی لیں گے۔انہوں نے کہا کہ حکومت نے ایسے تو نہیں سب کچھ کیا تھا، جو زبان دے کر مکر جائے اسے بیوقوف نہیں کچھ اور کہتے ہیں۔

(جاری ہے)

اسپیکر قومی اسمبلی نے بھی آئینی ترامیم سے متعلق مسودے سے لاعلمی کا اظہار کرتے ہوئے کہا کہ آئینی ترامیم سے متعلق مسودہ نہ انہیں دیا گیا نہ ہی انہوں نے مانگا۔

انہوںنے کہاکہ آئینی ترامیم سے متعلق کوئی فائنل ڈرافٹ تھا ہی نہیں بلکہ ایک ابتدائی ڈرافٹ تھا، حکومت کی آئینی ترامیم منظور کروانی کی مکمل تیاری تھی اسی لیے تو اجلاس بلایا گیا تھا، حکومت کی کوشش تھی کہ جن ترامیم پر جماعتیں مان جائیں گی وہ منظور کروا لی جائیں گی۔انہوں نے کہا کہ آئینی عدالت پر تو بانی پی ٹی آئی عمران خان کے دستخط بھی ہیں، تبھی تو حکومت نے اجلاس بلایا ہوگا کہ چلیں ایک آدھی تو ترمیم منظور کرا لیں گے۔

ایاز صادق نے واضح کیا کہ پارلیمنٹ کی کارروائیوں میں ایجنسیوں کا کوئی کردار نہیں، کسی ایجنسی کے کہنے پر کوئی میٹنگ منسوخ نہیں ہوتی۔انہوں نے حکومت کو پی ٹی آئی کی حمایت حاصل کرنے کے لیے کردار ادا کرنے کی پیشکش بھی کی۔انہوںنے کہاکہ حکومت کو پی ٹی آئی کی حمایت حاصل کرنے کے لیے ان سے بات چیت کی پیشکش کی کہ جن نکات پر تحریک انصاف مان لیتی ہے وہ نکات تو منظور کروا لیں۔صحافی نے سوال کیا کہ آپ کے اراکین نے بھی کہا کہ آپ کو پی ٹی آئی ارکان کی پارلیمنٹ ہاؤس سے گرفتاری سے متعلق علم تھا، جس پر اسپیکر ایاز صادق نے جواب دیا کہ وہ لوگ نہیں چاہتے کہ وہ اسپیکر کی کرسی پر بیٹھیں۔انہوں نے کہا کہ ان کے دوبارہ اسپیکر بننے سے ان کے پارٹی کے لوگ خوش نہیں ہیں۔