چیف الیکشن کمشنر کی تقرری چیلنج، درخواست قابل سماعت ہونے بارے جواب طلب

درخواست قابل سماعت نہیں ، ایسی درخواست اسلام آباد ہائیکورٹ میں دائر ہونی چاہیے‘سرکاری وکیل

جمعرات 2 مئی 2024 17:27

لاہور (اُردو پوائنٹ اخبارتازہ ترین - این این آئی۔ 02 مئی2024ء) چیف الیکشن کمشنر سکندر سلطان راجہ کی تقرری لاہور ہائیکورٹ میں چیلنج کر دی گئی۔چیف جسٹس لاہور ہائیکورٹ ملک شہزاد احمد خان نے ایڈووکیٹ طالب حسین کی درخواست پر سماعت کی۔

(جاری ہے)

درخواست میں موقف اختیار کیا گیا کہ چیف الیکشن کمشنر کی تقرری بغیر کسی اشتہار کے ہوئی تھی، سکندر سلطان راجہ کی تقرری سیاسی بنیادوں پر ون مین ایجنڈا کے تحت ہوئی، ایک آئینی ادارے میں ایک ریٹائرڈ افسر کو تعینات کرنا ملک و قوم کے ساتھ زیادتی ہے۔

درخواست گزار نے عدالت سے استدعا کی کہ چیف الیکشن کمشنر سکندر سلطان راجہ کی تقرری کو غیر قانونی قرار دیا جائے۔دوران سماعت سرکاری وکیل نے درخواست کی مخالفت کرتے ہوئے موقف اپنایا کہ درخواست قابل سماعت نہیں ہے، ایسی درخواست اسلام آباد ہائیکورٹ میں دائر ہونی چاہیے۔بعدازاں عدالت نے آئندہ سماعت پر درخواست کے قابل سماعت ہونے سے متعلق جواب طلب کرتے ہوئے کیس کی سماعت 6 مئی تک ملتوی کر دی۔