سندھ و بلوچستان کے 10 ارکانِ قومی و صوبائی اسمبلی کے نام بھی پراپرٹی لیکس میں شامل

صنعت کار اور پیپلز پارٹی کے ایم این اے اختیار بیگ دبئی میں تقریبا 2 درجن جائیدادوں کے مالک ہیں کمپنی اور جائیدادیں ٹیکس گوشواروں میں ظاہر کی گئی ہیں، کرائے کی آمدنی پر ٹیکس ادا کیا جاتا ہے،اختیار بیگ

بدھ 15 مئی 2024 18:31

کراچی (اُردو پوائنٹ اخبارتازہ ترین - این این آئی۔ 15 مئی2024ء) سندھ کے 4 ارکانِ قومی اسمبلی، بلوچستان اور سندھ کے 6 سے زائد ارکانِ صوبائی اسمبلی کے نام بھی دبئی پراپرٹی لیکس میں شامل ہیں۔صنعت کار اور پیپلز پارٹی کے ایم این اے اختیار بیگ دبئی میں تقریبا 2 درجن جائیدادوں کے مالک ہیں۔ان کی بیشتر جائیدادیں اہلیہ اور بھائی اشتیاق بیگ کے ساتھ مشترکہ ملکیت میں ہیں۔

اختیار بیگ کی جائیدادوں کی خریداری کی مالیت 1 لاکھ 37 ہزار 915 اور 3 لاکھ 29 ہزار 430 ڈالرز کے درمیان ہے۔

(جاری ہے)

اس حوالے سے اختیار بیگ کا کہنا ہے کہ کمپنی اور جائیدادیں ٹیکس گوشواروں میں ظاہر کی گئی ہیں، کرائے کی آمدنی پر ٹیکس ادا کیا جاتا ہے۔سربراہ بی این پی مینگل سردار اختر مینگل کی ملکیت میں دبئی میں 2009 سے ون بیڈ روم اپارٹمنٹ ہے۔2020 میں اپنے گوشواروں میں اختر مینگل نے بتایا تھا کہ یہ اپارٹمنٹ انہیں تحفہ میں ملا۔سابق وزیرِ اعلی بلوچستان ثنا اللہ زہری اور ان کی فیملی نے بھی دبئی کی جائیدادوں میں سرمایہ کاری کر رکھی ہے۔سابق صدر عارف علوی کی بہو بھی دبئی میں جائیداد کی مالک ہیں۔ان کے شوہر اواب علوی کے مطابق جائیداد اہلیہ کو وراثت میں ملی، جو ڈکلیئر ہے۔