پنجاب یونیورسٹی شعبہ سیاسیات کے زیر اہتمام ’جمہوریت، گورننس اور پائیداری‘ پردو روزہ کانفرنس

لاہور (اُردو پوائنٹ اخبارتازہ ترین - این این آئی۔ 15 مئی2024ء) پنجاب یونیورسٹی شعبہ سیاسیات کے زیر اہتمام ’’جمہوریت، گورننس اور پائیداری‘‘کے موضوع پر دو روزہ ہائبرڈ بین الاقوامی کانفرنس کی افتتاحی تقریب کا انعقادالرازی ہال میں کیا گیا۔ اس موقع پر سینئر صحافی مجیب الرحمان شامی،و ائس چانسلر منہاج یونیورسٹی لاہورڈاکٹر ساجد محمود شہزاد، ایگزیکٹو ڈائریکٹر پاکستان ریسرچ سینٹر فار اے کمیونٹی ود شیئرڈ فیوچر خالد تیمور اکرم ، چیئرپرسن شعبہ سیاسیات پروفیسر ڈاکٹر ارم خالد، فیکلٹی ممبران، محققین اور طلبائوطالبات نے شرکت کی۔

کانفرنس میں مقررین نے جمہوری طرز عمل اور حکمرانی کے خیال سیر حاصل بات چیت کی۔مقررین نے اس بات کو اجاگر کیا کہ نہ صرف مشرق بلکہ مغرب میں بھی جمہوری اصولوں پر نظر ثانی کی جارہی ہے۔

(جاری ہے)

کانفرنس کے سیشنز میں ٹیکنالوجی اور مصنوعی ذہانت کے استعمال اور جدیددور میں انفارمیشن مینجمنٹ کے استعمال پر روشنی ڈالی گئی۔ اپنے خطاب میںپروفیسرڈاکٹر ارم خالد نے بہترین کانفرنس کے انعقاد پر پروفیسر ڈاکٹر ریحانہ سعید ہاشمی اور ان کی ٹیم کی کاوشوں کو سراہا۔

انہوں نے کہا کہ کانفرنس میں 90 سے زائد قومی اور بین الاقوامی تحقیقی مقالے پیش کئے جارہے ہیں جس میں مصنوعی ذہانت کے ذریعے پائیدار ترقی سے لے کر پاکستان اور دنیا میں جمہوری ادارہ جاتی نظام کو برقرار رکھنے میں اداروں اور تنظیموں کے کردار تک کے مختلف موضوعات شامل ہیں۔