ڈسٹرکٹ سیشن جج اسلام آباد نے9 مئی واقعات مقدمے میں عمران خان کی بریت کی درخواست پر فیصلہ محفوظ کرلیا

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔16مئی۔2024 ) ڈسٹرکٹ اینڈ سیشن کورٹ اسلام آباد نے 9 مئی واقعات کے حوالے سے درج مقدمے میں تحریک انصاف کے بانی چیئرمین اور سابق وزیراعظم عمران خان کی بریت کی درخواست پر فیصلہ محفوظ کر لیا ہے. عمران خان کے خلاف تھانہ شہزاد ٹاون میں درج کیس کی سماعت ہوئی سابق وزیراعظم کی طرف سے وکیل نعیم حیدر پنجوتھا، آمنہ علی اور سردار مصروف عدالت میں پیش ہوئے وکیل نے کہا کہ تحریک انصاف کے بانی چیئرمین کے خلاف مقدمہ مجاز افسرز نے درج نہیں کرایا، ان کے خلاف سیاسی بنیادوں پر مقدمات قائم کیے گئے انہوں نے عدالت سے استدعا کی کہ ان کے موکل کو مقدمے سے بری کیا جائے.

(جاری ہے)

یاد رہے کہ گزشتہ روز ڈسٹرکٹ اینڈ سیشن کورٹس اسلام آباد نے آزادی مارچ کے دوران تھانہ کھنہ میں درج مقدمہ میں پاکستان تحریک انصاف کے بانی چیئرمین عمران خان کو بری کر دیا تھاجوڈیشل مجسٹریٹ نے بریت کی درخواست پر محفوظ فیصلہ سنایا فیصلے کے مطابق شواہد ناکافی ہونے کی بنیاد پر عدالت نے بریت کی درخواست منظور کی. سابق وزیراعظم عمران خان کے وکیل سردار مصروف اور مرزا عاصم نے بریت کی درخواست پر دلائل دیے تھے خیال رہے کہ مارچ میں ڈسٹرکٹ اینڈ سیشن کورٹس اسلام آباد نے لانگ مارچ کے دوران احتجاج اور توڑ پھوڑ کے مزید 2 کیسز میں عمران خان اور سربراہ عوامی لیگ شیخ رشید سمیت 11 ملزمان کو بری کردیا تھا.

یاد رہے کہ مئی 2022 میں اسلام آباد میں اختتام پذیر ہونے والے تحریک انصاف کے لانگ مارچ کے تناظر میں ملک بھر میں پولیس نے تحریک انصاف کے راہنماﺅں اور کارکنان کے خلاف دفعہ 144 سمیت دیگر سنگین خلاف ورزیوں پر درجنوں مقدمات درج کیے تھے. جڑواں شہروں راولپنڈی اور اسلام آباد میں دارالحکومت کی پولیس نے تحریک انصاف کے راہنماﺅں اور کارکنان کے خلاف قانون نافذ کرنے والوں کے خلاف مزاحمت کرنے اور ریاستی املاک کو نقصان پہنچانے پر کم از کم 3 مقدمات درج کیے تھے، الزامات میں میٹرو بس اسٹیشنز کو آگ لگانا بھی شامل ہے عمران خان کے خلاف تھانہ سہالا، لوہی بھیر اور تھانہ بارہ کہو میں بھی مقدمات درج کیے گئے تھے.