وزیر اعلیٰ مریم نواز کاپھول نگرکا دورہ، آر ایچ سی کا افتتاح، ٹیکنیکل کالج ،400ارب کاکسان پیکیج کا اعلان

گندم کا بحران نہیں ،گندم خریداری میں کرپشن کا راستہ بند کر دیا،کرپشن میں لتھڑے لوگوں کا پیٹ بھرنے کی بجائے عوام کیلئے روٹی سستی کرناضروری ہے رورل ہیلتھ سنٹرز کو بتدریج سولر انرجی پر منتقل کیا جائیگا،پھول نگر میں ڈھائی ارب روپے کی لاگت سے سڑک کی تعمیر جاری ہے ری ویمپنگ کے بعد پھول نگر رورل ہیلتھ سنٹر کا دورہ، استقبالیہ کاؤنٹر پر ہیلتھ انفارمیشن مینجمنٹ سسٹم کے تحت پرچی کے اجرا ء کے عمل کا مشاہدہ فارمیسی، ڈاکٹر آفس، ایمرجنسی وارڈ،ڈینٹل روم،لیبارٹری، میڈیسن سٹور، ایکسرے روم کا دورہ، ڈاکٹروں اور عملے سے بات چیت غریب کو بھی وہی علاج کی سہولیات ملیںگی جو ایک امیر کو پرائیویٹ ہسپتال میں ملتی ،کوئی ایسا ہسپتال نہیں ہوگا جہاں مفت علاج نہیں ہو رہا ہوگا پنجاب کے 13 کروڑ عوام کا مفاد عزیز ہے،عوام کے مفاد اور ان کی زندگیوں میں بہتری لانے کیلئے جو مجھ سے ہو سکا ضرورکروں گی 590 روڈزکی مرمت شروع ، پانچ سال بعد کوئی سڑک ٹوٹی نہیں ہوگی،کوئی ہسپتال ایسا نہیں ہوگا جہاں ڈاکٹراورمفت علاج نہیں ہورہاہوگا وزیر اعلیٰ مریم نوازشریف کا پھول نگر میں دیہی مرکز صحت کی ری ویمپنگ پراجیکٹ کے افتتاح کے بعد تقریب سے خطاب

جمعرات 16 مئی 2024 18:10

�اہور/پھولنگر (اُردو پوائنٹ اخبارتازہ ترین - این این آئی۔ 16 مئی2024ء) وزیر اعلیٰ پنجاب مریم نواز شریف نے پھول نگر رورل ہیلتھ سنٹر ری ویمپنگ پراجیکٹ کا افتتاح کردیا ۔ وزیر اعلیٰ مریم نواز شریف کو مراکز صحت کی ری ویمپنگ پر بریفنگ دی گئی اور بتایا گیا کہ پھولنگر رورل ہیلتھ سنٹر میں ماہانہ تقریباً 10ہزار مریض علاج کی سہولت حاصل کرتے ہیں اور رورل ہیلتھ سنٹر کو بتدریج سولر انرجی پر منتقل کیا جائیگا۔

وزیر اعلیٰ مریم نواز شریف نے افتتاح کے بعد رورل ہیلتھ سنٹر کا دورہ کیا۔ وزیر اعلیٰ مریم نواز شریف نے استقبالیہ کاؤنٹر پر ہیلتھ انفارمیشن مینجمنٹ سسٹم کے تحت پرچی کے اجرا کے عمل کا مشاہدہ کیا ۔وزیر اعلیٰ مریم نوازشریف نے فارمیسی، ڈاکٹر آفس، ایمرجنسی وارڈ،ڈینٹل روم،لیبارٹری، میڈیسن سٹوراور ایکسرے روم کا بھی دورہ کیا۔

(جاری ہے)

وزیر اعلیٰ مریم نوازشریف نے وویمن میڈیکل آفیسر، فی میل وارڈ،نرسری اورآپریشن تھیٹر کا بھی جائزہ لیا۔

ویل وویمن وارڈ،نرسنگ سٹیشن،ای پی آئی اور سکریننگ روم کا معائنہ بھی کیا۔ وزیر اعلیٰ مریم نواز شریف نے ڈاکٹروں اور عملے سے بات چیت کی۔ وزیر اعلی مریم نواز شریف نے افتتاحی تقریب سے خطاب کرتے ہوئے کہا کہ پنڈال میں مجھے بہت سارے نوجوان بچیاں اور خواتین نظر آرہی ہیں۔مجھے خوشی ہے کہ پھول نگر جیسی جگہ پر اتنی بڑی تعداد میں یہ بچیاں آئی ہیں۔

300 رورل ہیلتھ سنٹرز اور 2500 بیسک ہیلتھ یونٹس میں جدید سہولیات لا رہے ہیں۔ میری حکومت کو ابھی دو ماہ ہوئے ہیں،دو مہینے میں تو لوگ ابھی وعدے کر رہے ہوتے ہیں۔وزیر اعلیٰ مریم نوازشریف نے کہا کہ گواہ رہنا دو مہینے کے اندر مریم نواز نے آپ کے لئے نیا ہسپتال کھڑا کر دیا۔انشاء اللہ آئندہ چند ماہ میں پنجاب کے تمام ہسپتالوں کو تبدیل کر کے رکھ دیں گے۔

جہاں پر ڈاکٹرز کی کمی ہے ،وہاں ڈاکٹرز کو بھیج رہے ہیں،جہاں پر نرسز کی کمی ہے وہاں پر نرسز کو بھیج رہے ہیں۔ ہسپتالوں میں دل کے امراض کی سہولیات مہیا کررہے ہیں۔ انہوں نے کہا کہ کنٹینرز میں فیلڈ ہاسپٹل بنا کر پنجاب کے تمام شہروں میں بھیج دیے ہیں۔ کنٹینر میں پورا ہاسپٹل بنایا گیا ہے،جو آپ کی گھر کی دہلیز پر چل کر آئے گا اور علاج کرے گا۔

200 کلینک آن ویلز آپ کی دہلیز پر آپ کا علاج کرے گا۔کل صرف ایک دن میں 30 ہزار لوگوں کا کلینک آن ویلز میں علاج ہوا۔ نواز شریف کا وعدہ تھا کہ اقتدار میں آ کر لوگوں کے لیے آسانیاں پیدا کروں گا۔ نواز شریف نے کہا لوگوں کے لیے مہنگائی کم کروں گا۔وزیر اعلیٰ مریم نوازشریف نے کہا کہ روٹی کی قیمت20 روپے سے کم ہوکر 15 روپے پر آگئی ہے۔ اللہ کا فضل دیکھو دو مہینے کے اندر روٹی کی قیمت کتنی نیچے آگئی ہے۔

گندم کی خریداری میں کرپشن کے انبار لگ جاتے تھے، میں نے وہ راستہ بند کر دیا۔ صوبے میں کوئی گندم کا بحران نہیں ہے۔ کرپشن میں لتھڑے لوگوں کا پیٹ بھرنے کی بجائے اور میرے لئی13 کروڑ عوام کی روٹی سستی کرناضروری ہے۔ مریم نوازشریف نے کہا کہ چار ماہ میں کسان کے لیے 400 ارب روپے کا پیکیج لارہے ہیں۔ آئندہ فصل پر کسان خوشحال ہوجائے گا۔ ایک فصل کی کاشت کے لیے کسان کو ڈیڑھ لاکھ روپے دیں گے۔

کسان کو آڑھتی اور مڈل مین کے ہاتھوں ذلیل و خوار نہیں ہونے دیں گے۔ کسان ڈیڑھ لاکھ روپے سے کھاد، بیچ اور زرعی ادویات خرید سکے گا۔ کسان کومہنگے سود پر قرضہ نہیں لینا پڑے گا۔ جو پیکیج ہم لارہے ہیں، پنجاب کی تاریخ میں اتنا بڑا کسان پیکیج نہیں آیا۔ کسان کو آسان شرائط پر جدید زرعی مشینری دی جائے گی۔ وزیر اعلی نے کہا کہ صبح سات سے رات 12 بجے تک صحت اور تعلیم کے منصوبوں کے لئے کام کرتی ہوں۔

وزیر اعلیٰ مریم نوازشریف نے کہا کہ پھول نگر میں ڈھائی ارب روپے کی لاگت سے سڑک تعمیر کی جارہی ہے اور ٹیکنیکل کالج بھی بنایا جائے گا۔ انہوں نے کہا کہ چاہتی ہوں غریب کا بچہ بھی اسی طرح پڑھے جس طرح امیر کا بچہ پڑھتا ہے۔ غریب کو بھی وہی علاج کی سہولیات ملیں جو ایک امیر کو پرائیویٹ ہسپتال میں ملتی ہیں۔پنجاب کی 590 سڑکوں کو ٹھیک کرنے کا پروگرام شروع کر دیا ہے۔

انشاء ا للہ پنجاب کی کوئی سڑک پانچ سال بعد ٹوٹی نہیں ہوگی۔ پنجاب کا کوئی ایسا ہسپتال نہیں ہوگا جہاں مفت علاج نہیں ہو رہا ہو۔ہیپاٹائٹس، دل کے امراض اور ٹی بی کی مفت دوائیوں کا دو مہینے کا سٹاک لوگوں کے گھروں میں پہنچا رہے ہیں۔صحت اور تعلیم کے شعبے میں جتنا وقت میرا گزرتا ہے کسی اور شعبے پر نہیں گزرتا۔ نواز شریف کی ایک ہی ہدایت ہوتی ہے کہ لوگوں کے لیے آسانیاں پیدا کروں اور غریب کی خدمت کرو ں۔

انہوں نے کہا کہ ایم پی ایز اور ایم این ایزسے کہتی ہوں پولیس والوں کی سفارشیں کرنا چھوڑ دیں۔جب سیاسی بنیادوں پر پولیس کی پوسٹنگ ہوگی تو پولیس پرفارم نہیں کر سکتی۔ اپنے ذاتی مفاد سے زیادہ مجھے پنجاب کے 13 کروڑ عوام کا مفاد عزیز ہے۔عوام کے مفاد اور ان کی زندگیوں میں بہتری لانے کے لیے جو میرے سے ہو سکا کروں گی۔ نوجوانوں کے لیے ٹیکنیکل ایجوکیشن پروگرام شروع کردیاہے۔

جب بھی نواز شریف کی حکومت آتی ہے خدمت اور ترقی کا سفر شروع ہوتا ہے۔ہر دفعہ کوئی نہ کوئی بہانہ بنا کر، سازش کر کے اورو جھوٹا الزام لگا کر نواز شریف کی حکومت کو ختم کر دیا جاتا ہے۔ یہ نواز شریف کی حکومت ختم نہیں ہوتی بلکہ پاکستان کی ترقی کا سفر ختم ہو جاتا ہے۔نواز شریف کی چوتھی حکومت میں جو ترقی کا سفر شروع ہوا اسے کبھی رکنے نہ دینا۔

وفاق میں شہباز شریف کی حکومت اور پنجاب میں نواز شریف کی حکومت اگر پانچ سال پورے کر گئی تو پاکستان مکمل تبدیل ملک ہوگا۔ یہاں پر ایک ایسے انسان کی حکومت تھی جو کہتا تھا میں آلو،پیاز کی قیمتیں کم کرنے نہیں آیا۔بطور وزیراعلیٰ عوام کی روٹی، پیاز،سبزی میری ذمہ داری ہے۔وزیر اعلیٰ مریم نوازشریف نے کہا کہ جب میری حکومت آئی تو پیاز 300 روپے کلوتھا، آج 100 روپے سے کم پر فروخت ہو رہا ہے۔نواز شریف صاحب کا عوام کی خدمت کا جذبہ لے کر آگے بڑھ رہی ہوں۔ سینیٹرپرویز رشید، سینئر صوبائی وزیر مریم اورنگزیب ، صوبائی وزراء خواجہ سلمان رفیق ،خواجہ عمران نزیر، صہیب احمد بھرتھ، رانا سکندر حیات،ایم پی اے ثانیہ عاشق،چیف سیکرٹری، سیکرٹریزاور دیگر موجود تھے۔