کثیر قطبی دنیا کے قیام کے لیے چین اور دیگر ’’گلوبل ساؤتھ‘‘ممالک کے ساتھ تعاون کو مضبوط کرنے کے لیے تیار ہیں، ولادی میر پوٹن

بیجنگ (اُردو پوائنٹ اخبارتازہ ترین - اے پی پی۔ 17 مئی2024ء) روس کے صدر ولادی میر پوٹن نے کہا ہے کہ ان کا ملک بین الاقوامی عدل و انصاف کو فروغ دینے اور زیادہ مساوی اور کثیر قطبی دنیا کے قیام کے لیے چین اور دیگر ’’گلوبل ساؤتھ‘‘ ممالک کے ساتھ تعاون کو مضبوط کرنے کے لیے تیار ہے۔چین کے صدر شی جن پھنگ کے ساتھ جمعہ کو بیجنگ کے چونگ نان ہائی میں مختصر ملاقات میں روسی صدر نے کہا کہ دنیا کی کوئی طاقت چین کی ترقی کو روک نہیں سکتی۔

صدر پیوٹن نے کہا کہ روس یوکرین کے معاملے پر چین کے معروضی، منصفانہ اور متوازن موقف کو سراہتا ہے اور یوکرینی مسئلے کے سیاسی حل میں چین کا اہم اور تعمیری کردار ادا کرنے کا خیرمقدم کرتا ہے۔ روس یوکرین مسئلے کو سیاسی مذاکرات کے ذریعے حل کرنے کے لیے پرعزم ہے اور اس سلسلے میں چین کے ساتھ قریبی رابطہ برقرار رکھے گا۔

(جاری ہے)

چینی میڈ یا کے مطا بق شی دونوں ممالک کے رہنماؤں نے پر سکون ماحول میں مشترکہ تشویش کے اسٹریٹجک امور پر تبادلہ خیال کیا۔

چین کے صدر شی جن پھنگ نے اس موقع پر یہ نشاندہی کی کہ چین اتحاد اور تعاون کو مضبوط بنانے، عالمی نظم و نسق کی درست سمت میں رہنمائی کرنے،بین الاقوامی عدل و انصاف کے تحفظ اور عالمی امن اور مشترکہ ترقی کو فروغ دینے کے لیے روس اور دیگر ممالک کے ساتھ مل کر کام کرنے کے لیے تیار ہے۔ شی جن پھنگ نے کہا کہ یوکرین کے بحران کا بنیادی حل ایک متوازن، موثر اور پائیدار نئے سیکورٹی ڈھانچہ کی تعمیر ہے۔ چین یوکرینی مسئلے کے جلد سیاسی حل کی حمایت کرتا ہے اور اس سلسلے میں تعمیری کردار ادا کرنے کے لیے تیار ہے۔