ترکیہ کا امریکہ سے ایف 16 طیارے خریدنے کا معاہدہ

معاہدے کے تحت ترکیہ کو 40 نئے ایف 16 طیارے دیئے جائیں گے

ہفتہ 15 جون 2024 14:04

ترکیہ کا امریکہ سے ایف 16 طیارے خریدنے کا معاہدہ

انقرہ(اُردو پوائنٹ اخبارتازہ ترین - این این آئی۔ 15 جون2024ء) ترکیہ نے امریکہ سے ایف 16 جنگی طیارے خریدے کا معاہدہ کر لیا۔غیر ملکی خبر رساں ایجنسی کے مطابق ترکیہ کی وزارت دفاع نے کہا ہے کہ ترکیہ اور امریکہ نے ایف 16 جنگی طیاروں کی فروخت کے معاہدوں پر دستخط کر دیئے ہیں۔ واشنگٹن نے مذاکرات کے بعد 23 ارب ڈالر کے معاہدے کی اجازت دی۔معاہدے کے تحت ترکیہ کو 40 نئے ایف 16 طیارے دیئے جائیں گے جبکہ اس کے موجودہ بیڑے میں 79 جیٹ طیاروں کو اپ گریڈ کیا جائے گا۔

(جاری ہے)

امریکی محکمہ خارجہ نے گذشتہ ہفتے ترکیہ کی جانب سے نئے ایف 16 جنگی طیاروں کی خریداری میں اہم پیش رفت کا خیرمقدم کیا اور انہیں صرف قریبی اتحادیوں اور شراکت داروں کے لیے دستیاب اب تک کے جدید ترین طیارے قرار دیا۔یہ بات قابلِ ذکر ہے کہ جب تک ترکیہ کی طرف سے سویڈن کی نیٹو رکنیت کی توثیق کی دستاویزات واشنگٹن نہیں پہنچ گئیں۔ امریکہ نے اس سودے کی اجازت نہیں دی۔ایک سال سے زیادہ تاخیر کے بعد ترکیہ کی پارلیمینٹ نے سویڈن کی نیٹو رکنیت کی توثیق کی۔ جو یوکرین کے خلاف روس کی جنگ کے باوجود متحد ہونے کے لیے مغربی ممالک کے لیے پریشانی کا باعث بنا۔