وزیر اعظم محمد شہباز شریف متحدہ عرب امارات کے ایک روزہ دورہ پر ابوظہبی پہنچ گئے

ابوظہبی(اُردوپوائنٹ اخبارتازہ ترین۔23مئی۔2024ء) وزیر اعظم محمد شہباز شریف متحدہ عرب امارات کے ایک روزہ دورہ پر ابوظہبی پہنچ گئے۔ ابو ظہبی پہنچنے پر نائب صدر، نائب وزیرِ اعظم و چیئرمین صدارتی دربار شیخ منصور بن زاید النہیان نے وزیرِ اعظم کا پرتپاک استقبال کیا. استقبالیے میں متحدہ عرب امارات میں پاکستانی سفیر فیصل نیاز ترمزی، پاکستان میں اماراتی سفیر حماد عبید ابراہیم الزعابی اور اعلی پاکستانی و اماراتی حکام بھی شریک تھے.

نائب وزیراعظم و وزیر خارجہ اسحاق ڈار ، وفاقی وزیر دفاع خواجہ آصف ، وفاقی وزیر تجارت جام کمال خان ، وفاقی وزیر اطلاعات و نشریات عطاء اللہ تارڑ اور وزیراعظم کے معاون خصوصی طارق فاطمی بھی وزیراعظم کے ہمراہ ہیں۔

(جاری ہے)

وزیرِ اعظم کا وزارتِ عظمی کا منصب سنبھالنے کے بعد متحدہ عرب امارات کا یہ پہلا دورہ ہے. ابوظہبی میں وزیرِ اعظم محمد شہباز شریف اور صدر متحدہ عرب امارات محمد بن زاید النہیان کے درمیان ملاقات ہوگی.

ملاقات میں متحدہ عرب امارات اور پاکستان کے مابین تعاون کے مزید فروغ کے حوالے سے گفتگو ہوگی. وزیرِ اعظم اپنے دورے کے دوران انفارمیشن ٹیکنالوجی کے شعبے سے تعلق رکھنے والی پاکستانی اور متحدہ عرب امارات کی کاروباری شخصیات و سرمایہ کاروں سے ملاقات کریں گے. وزیرِ اعظم اس موقع پر گفتگو بھی کریں گے. پی ٹی وی نیوز وزیرِ اعظم کی گفتگو براہ راست نشر کرے گا.

(متوقع وقت: دوپہر 2 بجکر 30 منٹ -پاکستان کے معیاری وقت کے مطابق) اسکے علاوہ وزیرِ اعظم متحدہ عرب امارات کے اعلی حکومتی عہدیداروں اور اماراتی کاروباری شخصیات سے بھی ملاقاتیں کریں گے. وزیرِ اعظم کا دورہ، پاکستان اور متحدہ عرب امارات کے مابین موجود دیرینہ برادرانہ تعلقات کے ایک نئے دور کا آغاز ہے. وزیرِ اعظم کی اعلی اماراتی قیادت اور کاروباری برادرای سے ملاقاتیں حکومت کی سفارتی کامیابیوں اور دوست ممالک کے پاکستان میں سرمایہ کاری کے بڑھتے ہوئے رجحان کی عکاسی کرتی ہیں۔