الیکشن ٹربیونل ، انتخابی عذرداری کیس، پی ٹی آئی وکلا کو اسٹے ختم کرانے کی ہدایت

پیر 15 جولائی 2024 18:54

اسلام آباد (اُردو پوائنٹ اخبارتازہ ترین - این این آئی۔ 15 جولائی2024ء) الیکشن ٹربیونل نے انتخابی عذرداری کیس، پی ٹی آئی وکلا کو اسٹے ختم کرانے کی ہدایت کی ہے ۔الیکشن ٹربیونل میں اسلام آباد کے حلقوں این اے 46، این اے 47، این اے 48 میں انتخابی عذرداریوں کی سماعت جسٹس طارق محمود جہانگیری نے کی۔ٹربیونل نے وکیل شعیب شاہین سے سوال کیا کہ آپ کے پاس تو تمام فارمز آ گئے ہیں اب کیا چاہیی وکیل شعیب شاہین نے کہا کہ میں اپنے کیس کی بات کروں گا مجھے فارمز نہیں ملے۔

جسٹس طارق جہانگیری نے شعیب شاہین سے مکالمہ کرتے ہوئے کہا کہ ہائی کورٹ نے ٹرائل آگے بڑھانے پر اسٹے دیا ہے، ہم نے تینوں ایم این ایز کو طلب کیا تھا، روزانہ کی بنیاد پر ٹرائل کرنے کا بھی حکم دیا تھا، میں تو روزانہ کی بنیاد پر ٹرائل کیلئے تیار ہوں، آپ جا کر اسٹے ختم کرائیں، تمام فریقین کی جانب سے جواب آ چکا، ایک ہفتے کے اندر کیس نے ختم ہونا ہے، اگر میں 20 صفحات پر فیصلہ دوں اور کیس دوسرے ٹربیونل میں چلاجائے پھر کیا ہو گا، جب تک ہائی کورٹ کے اسٹے آرڈر فیلڈ میں ہے تو کچھ نہیں ہوسکتا۔

(جاری ہے)

درخواست گزار کے وکیل نے کہا کہ عدالتی آرڈر پر فریقین نے ابھی تک عمل درآمد ہی نہیں کیا، ای ایم ایس ریکارڈ جمع کرانے کے لیے ریٹرننگ افسر کو عدالت نے حکم دیا تھا۔الیکشن ٹربیونل نے کہا کہ 22 جولائی کو چیف جسٹس نے سماعت کرنی ہے، اگر اسٹے ختم ہو گیا تو ہم سماعت جاری رکھیں گے، اس کیس کو 24 جولائی کو رکھ لیتے ہیں، آگے دیکھا جائے گا جس کے بعد الیکشن ٹربیونل نے کیس کی سماعت 24 جولائی تک کے لیے ملتوی کر دی۔