ٹرمپ کو بڑا عدالتی ریلیف، خفیہ دستاویزات ساتھ لے جانے کا کیس خارج

دفاعی وکلا کی کیس خارج کرنے کی تحریک منظور ،مقدمے کو کالعدم قرار دے دیا گیا

منگل 16 جولائی 2024 16:01

فلوریڈا(اُردو پوائنٹ اخبارتازہ ترین - این این آئی۔ 16 جولائی2024ء) امریکی ریاست فلوریڈا کے ایک وفاقی جج نے سابق صدر ڈونلڈ ٹرمپ کے خلاف خفیہ دستاویزات کے کیس کو خارج کر دیا۔غیرملکی خبررساں ادارے کے مطابق کیس خارج کرتے ہوئے جج کا کہنا تھا کہ الزامات دائر کرنے والے خصوصی وکیل کو محکمہ انصاف نے غیر قانونی طور پر تعینات کیا تھا۔امریکا کی ڈسٹرک جج ایلین کینن نے دفاعی وکلا کی کیس خارج کرنے کی موشن منظور کرتے ہوئے ایک ایسے مقدمے کو کالعدم قرار دیا گیا ہے جو ڈونلڈ ٹرمپ کے خلاف متعدد مقدمات میں سب سے سنگنین نوعیت کا تھا۔

جج ایلین کینن نے اپنے حکمنامے میں لکھا سابق صدر ٹرمپ کی فردِ جرم کو خارج کرنے کی موشن جو کہ خصوصی وکیل جیک اسمتھ کی غیر قانونی طور پر تعیناتی اور فنڈنگ پر مبنی ہے، منظور کی جاتی ہے۔

(جاری ہے)

حکمنامے میں یہ بھی لکھا گیا کہ اسپیشل کونسل اسمتھ کی تعیناتی امریکی آئین کے تعیناتی شق کی خلاف ورزی کی وجہ سے سپرسیڈنگ انڈائٹمنٹ خارج کی جاتی ہے۔ سنایا جانے والا یہ فیصلہ ڈونلڈ ٹرم کی ایک بڑی فتح ہے، جن پر وائٹ ہاس چھوڑتے وقت انتہائی خفیہ دستاویزات ساتھ لے جا کر قومی سلامتی کو خطرے میں ڈالنے کا الزام عائد کیا گیا تھا۔سابق امریکی صدر کو یہ کامیابی ایک ایسے وقت میں ملی ہے جب ایک روز قبل ہی وہ ایک قاتلانہ حملے میں محفوظ رہے ہیں۔