پی ٹی آئی نے شیر افضل مروت کی بنیادی رکنیت ختم کر دی،قومی اسمبلی کی رکنیت چھوڑنے کاحکم،نوٹیفکیشن جاری

اسلام آباد(اردو پوائنٹ اخبارتازہ ترین۔03اگست 2024 ) پاکستان تحریک انصاف نے پارٹی رہنما اورپارٹی کے سینئر رہنماءو ایم این اے شیر افضل مروت کی بنیادی رکنیت ختم کر دی،قومی اسمبلی سے مستعفی ہونے کا مطالبہ بھی کر دیا،شیر افضل مروت کی بنیادی رکنیت ختم کرنے کی منظوری بانی پی ٹی آئی عمران خان نے دی ہے، پی ٹی آئی کے ایڈیشنل جنرل سیکریٹری فردوس شمیم نقوی نے نوٹیفکیشن جاری کر تے ہوئے کہا ہے کہ پی ٹی آئی نے سنگین خلاف ورزیوں پر شیر افضل مروت کی بنیادی پارٹی رکنیت منسوخ کرنے کا فیصلہ کیا ہے ۔

ان کا یہ بھی کہنا تھا کہ شیر افضل مروت نوٹس پیریڈ پر تھے۔بتایاگیا ہے کہ پی ٹی آئی رہنما شیر افضل مروت کی پارٹی رکنیت ختم کرنے سے متعلق حتمی فیصلہ کور کمیٹی کے اجلاس میں ہوا جس کے بعد نوٹیفکیشن جاری کیا گیا۔

(جاری ہے)

پی ٹی آئی کی جانب سے جاری کردہ اعلامیے میں مزید کہا گیا ہے کہ نوٹس پیریڈ کے دوران انضباطی کمیٹی نے محسوس کیا کہ شیر افضل مروت کو پارٹی ضوابط کا کوئی خیال نہیں ہے۔

شیرافضل مروت خود کو پارٹی قوانین سے بالاتر سمجھتے ہیں۔ جس سے پارٹی کی تصویر اور پارٹی کا بیانیہ بری طرح مسخ ہوا ہے۔ تحریک انصاف کے اعلامیے میں مزید کہا گیا کہ اگر شیر افضل مروت ایک عزت دار شخص ہیں تو وہ قومی اسمبلی کی رکنیت سے بھی استعفیٰ دے دیں۔ نوٹیفکیشن میں کہا گیا ہے کہ پالیسی کی خلاف ورزی کرنے پر شوکاز نوٹس بھی جاری ہوا تھا کہ اپنے بیانات جاری کردہ ہدایات کے مطابق دیں۔

شیر افضل مروت کی ٹوئٹس اور میڈیا کے بیانات کی نگرانی کیلئے ایک کمیٹی بنائی گئی تھی۔خیال رہے کہ شیرافضل مروت کو متنازع بیانات دینے کے بعد جولائی کے مہینے میں پارٹی نے شوکاز نوٹس جاری کیا تھا جس پر شیر افضل مروت کی جانب سے شوکاز نوٹس کا جواب دیا گیا لیکن پارٹی نے ان کا جواب غیر تسلی بخش قرار دیا تھا۔اس سے قبل پاکستان تحریک انصاف نے شیر افضل مروت کو شوکاز نوٹس جاری کیا تھا۔

پی ٹی آئی کی جانب سے شیر افضل مروت کو شوکاز نوٹس پارٹی کے جنرل سیکرٹری عمر ایوب کی جانب سے جاری کیا گیا تھاجس میں کہا گیا تھا کہ آپ کے غیر ذمہ دارانہ بیانات سے پارٹی کے مفادات کو نقصان پہنچا ہے اور بانی پی ٹی آئی کی ہدایات کے باوجودآپ نے بیانات دئیے۔نوٹس میں مزید کہا گیا تھاکہ آپ کے بیان سے پارٹی ممبران اور سٹیک ہولڈرز کے درمیان تعلقات خراب ہوئے تھے ۔

آپ تین روز کے اندر اندر جواب دیں اور اگر آپ کا جواب اطمینان بخش نہ ہوا تو پارٹی آپ کے خلاف ایکشن لے گی۔فیصل آباد میں میڈیا سے گفتگو کرتے ہوئے عمر ایوب نے کہا تھاکہ شیر افضل مروت کو آج شوکاز نوٹس جاری کردیا تھا اور شیر افضل مروت کا فیصلہ عمران خان نے کرنا تھا۔ یاد رہے کہ پاکستان تحریک انصاف کے جنرل سیکرٹری عمر ایوب نے کہا تھا کہ بانی پی ٹی آئی عمران خان نے شیر افضل مروت کو کورکمیٹی اور سیاسی کمیٹی سے نکالنے کا حکم دیا تھا۔

اڈیالہ جیل کے باہر میڈیا سے گفتگو کرتے ہوئے عمر ایوب کا کہنا تھا کہ عمران خان نے شیر افضل مروت کو شوکاز جاری کرنے کاحکم دیا تھا۔ انہوں نے کہا تھاکہ شیر افضل مروت نے سعودی حکومت سے تعلقات خراب کرنے کی کوشش کی تھی۔عمر ایوب کا یہ بھی کہنا تھا کہ شیرافضل مروت کو بانی پی ٹی آئی نے بہت عزت و احترام دیاتھا۔ شیرافضل مروت کو بارہا پارٹی پالیسی کی خلاف ورزی نہ کرنے کی ہدایات دی گئیں تھیں۔

بانی پی ٹی آئی نے کہا تھاکہ سعودی حکومت کے ساتھ ذاتی تعلقات کو شیر افضل مروت نے زک پہنچائی تھی۔ بانی پی ٹی آئی کے ولی عہد پرنس محمد بن سلمان کے ساتھ نہایت اچھے تعلقات تھے۔ان کا یہ بھی کہنا تھا کہ عمران خان نے حکم جاری کیا تھا کہ شیرافضل مروت کو کورکمیٹی اور پولیٹیکل کمیٹی سے الگ کیاجائے۔بانی پی ٹی آئی نے یہ بھی کہا تھا کہ پولیٹیکل کمیٹی شیر افضل مروت کے خلاف ڈسپلنری ایکشن لیا جائے۔