دھرنے سے لوگوں میں امید پیدا ہوئی، پیچھے نہیں ہٹ سکتے، امیرجماعت اسلامی

مطالبات کی منظوری تک دھرنا ختم نہیں کریں گے، عوامی مسائل پر ہی سیاست ہوگی، اپنا حق لے کر اٹھیں گے، حافظ نعیم الرحمن

ہفتہ 3 اگست 2024 18:02

دھرنے سے لوگوں میں امید پیدا ہوئی، پیچھے نہیں ہٹ سکتے، امیرجماعت اسلامی

راولپنڈی (اُردو پوائنٹ اخبارتازہ ترین - این این آئی۔ 03 اگست2024ء) امیر جماعت اسلامی پاکستان حافظ نعیم الرحمن نے کہا ہے کہ اس دھرنا سے لوگوں میں امید پیدا ہوئی ہے، مطالبات کی منظوری تک دھرنا ختم نہیں کریں گے، عوامی مسائل پر ہی سیاست ہوگی، اپنا حق لے کر اٹھیں گے۔امیر جماعت اسلامی حافظ نعیم الرحمان نے دھرنے کے شرکا سے خطاب کرتے ہوئے کہا کہ آج تاریخی دھرنیکا 9واں دن ہے، ہمارا دھرنا عوامی قوت بنتا جارہا ہے، دھرنے کے شرکا پرامن طریقے سے یہاں موجود ہیں، شرکا کو خراج تحسین پیش کرتا ہوں۔

انہوں نے کہا کہ اس دھرنا سے لوگوں میں امید پیدا ہوئی ہے، اس دھرنا سے پیچھے نہیں ہٹ سکتے، عوامی مسائل پر ہی سیاست ہوگی، اپنا حق لے کر اٹھیں گے، عوام کی مصیبتوں کو ختم کیا جائے، یہی ہماری سیاست ہے۔

(جاری ہے)

امیر جماعت اسلامی پاکستان نے کہا کہ بجلی کے بلوں سے لوگ انتہائی پریشان ہیں، میں جب قطر نماز جنازہ کے لیے روانہ ہوا تو ائیرپورٹ پر ایسے لوگ ملے جنہوں نے موٹر سائیکل بیچ کر بجلی کے بل ادا کیے۔

انہوں نے کہا کہ یہ چاہتے ہیں کہ ذاتیات اورخاندان کی سیاست چلتی رہے لیکن پاکستان میں نیا کلچر متعارف کرایا جارہا ہے اور ملک میں الیکٹیبلز کی سیاست ختم ہورہی ہے۔انہوںنے کہاکہ ہم اب دھرنے سے پیچھے نہیں ہٹ سکتے، آج سے کراچی میں بھی دھرنے شروع ہوجائیں گے، پورے ملک میں یہ سلسلہ جاری ہوگا۔امیر جماعت اسلامی پاکستان نے سوال کیا کہ وزیراعظم 1300 سی سی گاڑی میں خود کیوں نہیں بیٹھ سکتے، 1300 سی سی گاڑی میں تو پلیٹ لیٹس کا مسئلہ نہیں ہوتا، عوام ان کی مراعات اپنے بلوں میں کیوں ادا کریں، قوم کے سامنے اپنی مراعات کم کرنے کا اعلان کیوں نہیں کرتی ۔