کراچی (اُردو پوائنٹ اخبارتازہ ترین - اے پی پی۔ 07 اگست2024ء) میئر
کراچی بیرسٹر مرتضی وہاب نے کہا ہے کہ فٹ بال
دنیا کا سب سے مقبول ترین
کھیل ہے،
پاکستان کے لئے یہ اعزاز کی بات ہے کہ ہماری یوتھ فٹ بال ٹیم نے
ناروے میں منعقد ہونے والی فٹ بال چیمپئن شپ 2024 میں دوسری پوزیشن حاصل کی اور عالمی سطح پر نوجوان پاکستانی فٹ بالرز کی کارکردگی کو سراہا گیا، ٹورنامنٹ کے لئے مختصر تیاری کے باوجود پاکستانی ٹیم کی جانب سے انتہائی حوصلہ افزا کارکردگی کا مظاہرہ اس امر کی دلیل ہے کہ ہمارے نوجوان انتہائی باصلاحیت اور محنتی ہیں اور کسی بھی شعبے میں ملک و قوم کا نام روشن کرنے کی مکمل صلاحیت رکھتے ہیں۔
ان خیالات کا اظہار انہوں نے بدھ کے روز بلدیہ عظمی
کراچی کے صدر دفتر میں یوتھ فٹ بال ٹورنامنٹ
ناروے میں دوسری پوزیشن حاصل کرنے والی پاکستانی ٹیم کے کھلاڑیوں سے ملاقات کے موقع پر کیا۔
(جاری ہے)
میئر کراچی نے کہا کہ مقامی سطح پر فٹ بال اکیڈمی کے قیام کے لئے بلدیہ عظمی کراچی پاکستانی یوتھ فٹ بال ٹیم کی انتظامیہ کے ساتھ بھرپور تعاون کرے گی تاکہ مستقبل میں پاکستان کے یہ ہونہار کھلاڑی مزید کامیابیاں حاصل کریں اور شہری صوبائی اور ملکی سطح پر فٹ بال کے کھیل کو مزید فروغ حاصل ہو۔
فٹ بال ٹیم سے ملاقات کے موقع پر ڈپٹی میئر
کراچی سلمان عبداللہ مراد نے کہا کہ
پاکستان پیپلزپارٹی کھیلوں کی سرگرمیوں کو فروغ دینے کے لئے اقدامات اٹھا رہی ہے، نوجوان کھلاڑیوں کو ہر سطح پر سپورٹ کریں گے، اس شہر کی ترقی و خوشحالی کے لئے ہرممکن اقدامات اٹھائیں گے۔ ڈپٹی میئر
کراچی نے نوجوان کھلاڑیوں کی حوصلہ افزائی کرتے ہوئے ٹیم کو اعزازی شیلڈ بھی دی اور اس توقع کا اظہار کیا کہ
پاکستان کے نوجوان فٹبالرز اپنے
کھیل کے معیار کو مزید بہتر بنا کر مستقبل میں ملک و قوم کے لئے کامیابیاں حاصل کریں گے۔
میئر
کراچی بیرسٹر مرتضی وہاب نے ٹیم کے کھلاڑیوں اور منتظمین سے گفتگو کرتے ہوئے کہا کہ
ناروے میں منعقد ہونے والے اس ٹورنامنٹ میں
دنیا کی مختلف ٹیموں کی نمائندگی کرنے والے تقریبا 2200 کھلاڑیوں نے شرکت کی تھی، پاکستانی ٹیم نے پورے ٹورنامنٹ کے دوران غیرمعمولی کارکردگی پیش کرکے تماشائیوں سے زبردست داد حاصل کی۔ فائنل تک رسائی کے دوران پاکستانی ٹیم نے مخالف ٹیموں کے خلاف مجموعی طور پر 26 گول کئے جبکہ اس کے خلاف صرف پانچ گول ہوسکے تاہم فائنل میچ میں
ناروے کے کلب کفم کام اوسلو کے خلاف مقابلہ مقررہ وقت پر 2،2 گول سے برابر رہا جس کے بعد پنالٹی شوٹ آئوٹ پر
پاکستان کو شکست کا سامنا کرنا پڑا۔
میئر
کراچی بیرسٹر مرتضی وہاب نے پاکستانی یوتھ فٹ بال ٹیم کی حوصلہ افزائی کے لئے ایک ملین روپے انعام دینے کا بھی اعلان کیا۔ میئر
کراچی نے کہاکہ فٹ بال کا کھیل
پاکستان بالخصوص
کراچی میں بے حد مقبول ہے اور
لیاری ایک ایسا علاقہ ہے جہاں سے
پاکستان کی
فٹبال ٹیم کو ماضی میں بہترین اور نامور کھلاڑی ملے ہیں جنہوں نے عالمی سطح پر
پاکستان کا نام روشن کیا ہے، ہرممکن کوشش کی جا رہی ہے کہ
لیاری سمیت
کراچی کے دیگر علاقوں میں قائم ضلعی فٹ بال ٹیموں کے معیار کو بلند کیا جائے۔
انہوں نے کہا کہ کے ایم سی کی اپنی فٹ بال ٹیم ہے جس کی کارکردگی کو مزید بہتر بنایا جا رہا ہے تاکہ قومی سطح کے کھلاڑی تیار کئے جاسکیں، آنے والے دنوں میں قومی فٹ بال ٹیم کو
ناروے میں منعقد ہونے والے اس فٹ بال ٹورنامنٹ کے نتیجے میں اچھے اور باصلاحیت کھلاڑی میسر آئیں گے جو عالمی سطح پر
پاکستان کا پرچم بلند کرنے میں اپنا کردار ادا کرسکیں گے۔
