سیلابی ریلے میں پھنسے افراد کو بچانے والے ڈرائیور کی وزیراعظم سے ملاقات

شہبازشریف کا اپنی جان کی پرواز کئے بغیر لوگوں کی جان بچانے والے ایکسکویٹر ڈرائیور کیلئے25لاکھ انعام کااعلان،مشکل حالات میں جان جوکھوں میں ڈال کر انسانی جانیں بچانا بہادری ہے،وزیراعظم کی ملاقات کے موقع پر گفتگو

فیصل علوی بدھ 4 ستمبر 2024 15:41

سیلابی ریلے میں پھنسے افراد کو بچانے والے ڈرائیور کی وزیراعظم سے ملاقات

اسلام آباد(اردو پوائنٹ اخبارتازہ ترین۔04ستمبر 2024 ) بلوچستان کے علاقے قلعہ عبداللہ میں سیلابی ریلے میں پھنسے افراد کی جان بچانے والے ڈرائیور محب اللہ کی وزیراعظم سے ملاقات،شہبازشریف کا اپنی جان کی پرواز کئے بغیر لوگوں کی جان بچانے والے ایکسکویٹر ڈرائیور کیلئے25لاکھ انعام کااعلان، وزیراعظم ہاوس آمد پر محب اللہ کو خوش آمدید کہاگیا اور ان کے انسانی جانوں کو بچانے کے جذبے کو سراہا۔

وفاقی وزیرِ اطلاعات و نشریات عطا اللہ تارڑ۔ وفاقی وزیر تجارت جام کمال خان، وزیرمملکت برائے انفارمیشن ٹیکنالوجی شزہ فاطمہ خواجہ، چیئرمین وزیراعظم یوتھ پروگرام رانا مشہود احمد خان، وزیراعظم کی کوآرڈینیٹر برائے ماحولیاتی تبدیلی رومینہ خورشید عالم اور متعلقہ اعلی ٰحکام بھی اس موقع پرموجود تھے۔

(جاری ہے)

وزیراعظم شہباز شریف نے اس موقع پر گفتگو کرتے ہوئے کہا کہ مشکل حالات میں جان جوکھوں میں ڈال کر انسانی جانیں بچانا بہادری ہے۔

اپنی جان کی پرواہ کئے بغیر سیلابی ریلے میں پھنسے لوگوں کو بچانے والے محب اللہ پر پوری قوم کو فخر ہے۔اس موقع پر وزیراعظم نے محب اللہ کو 25 لاکھ روپے انعام دیا اور ان کے بچوں کیلئے یونیورسٹی تک کی تعلیم مفت اور ان کے خاندان کو صحت کی مفت سہولیات کی فراہمی کا بھی اعلان کیا۔شہباز شریف نے کہا کہ آپ قوم کے ہیرو ہیں۔ آپ نے ہمت سے کام لے کر قیمتی انسانی جانیں بچائیں۔

ایسے مشکل حالات میں اپنی جان جوکھوں میں ڈال کر انسانی جانوں کو بچانا بہادری کا کام ہے۔وزیراعظم نے کہا کہ مجھ سمیت پوری قوم کو آپ پر فخر ہے۔ آپ کے انسانیت سے محبت کے جذبے کی دل سے قدر کرتا ہوں۔ڈرائیورمحب اللہ نے اس موقع پر وزیراعظم سے گفتگوکرتے ہوئے کہا کہ آپ سے ملاقات میرے لئے اعزاز کی بات ہے۔ لوگوں کی جانیں بچاتے وقت قطعاً نہیں سوچا تھا کہ یہ بات پورے ملک میں مشہور ہو جائے گی۔انہوں نے کہا کہ وزیر اعظم اور حکومت کا شکر گزار ہوں کہ انہوں نے اس اقدام کو سراہا اور میرے لئے قیمتی وقت نکالا، وزیر اعظم ہاوس میں وزیرِ اعظم کی جانب سے عزت افزائی پر تہہ دل شکر گزار ہوں۔