بیرونی فنانسنگ میں ناکامی، آئی ایم ایف سے قرض مؤخر ہونے کا امکان

آئی ایم ایف کی جانب سے نشاندہی کردہ 2 ارب ڈالر کے مالیاتی فرق پر دو طرفہ قرض دہندگان سے یقین دہانیاں حاصل کرنے کی آخری کوششیں جاری ہیں۔ رپورٹ

ساجد علی منگل 10 ستمبر 2024 10:20

بیرونی فنانسنگ میں ناکامی، آئی ایم ایف سے قرض مؤخر ہونے کا امکان

اسلام آباد ( اُردو پوائنٹ اخبارتازہ ترین۔ 10 ستمبر 2024ء ) حکومت کی جانب سے بیرونی فنانسنگ میں ناکامی کے باعث آئی ایم ایف سے قرض مؤخر ہونے کا امکان پیدا ہوگیا۔ دی نیوز کے مطابق پاکستان کو تاحال بیرونی فنانسنگ گیپ کو پورا کرنے میں مشکلات کا سامنا ہے، اگر پاکستان جاری ہفتے میں دو طرفہ اور تجارتی قرض دہندگان سے 2 ارب ڈالر کی بیرونی فنانسنگ حاصل کرنے میں ناکام رہا تو عالمی مالیاتی ادارے آئی ایم ایف کے ایگزیکٹو بورڈ سے پاکستان کے 7 ارب ڈالر کے قرض کی منظوری مؤخر ہوجانے کا خدشہ ہے کیوں کہ پیشگی شرائط پوری ہونے کے بعد ہی پاکستان کا ایجنڈا شامل ہونے کا امکان ہے۔

اعلیٰ سرکاری ذرائع کا حوالہ دیتے ہوئے بتایا گیا ہے کہ پاکستان کو اپنا دستخط شدہ لیٹر آف انٹینٹ (ایل او آئی) آئی ایم ایف کے ایگزیکٹو بورڈ کو بھیجنا ہے جس میں تحریری وعدہ کیا جائے گا کہ حکومت پاکستان فنڈ پروگرام کی تمام متفقہ شرائط کی تعمیل کرے گی اور اس کی بنیاد پر37 ماہ کے توسیعی فنڈ سہولت (ای ایف ایف) کے تحت 7 ارب ڈالر کی منظوری پر غور کرنے کی درخواست کی جائے گی۔

(جاری ہے)

معلوم ہوا ہے کہ پاکستان 18 ستمبر 2024ء تک آئی ایم ایف کے ایگزیکٹو بورڈ کے ایجنڈے میں موجود نہیں ہے کیوں کہ حکومت تاحال بیرونی فنانسنگ کے حصول میں ناکام ہے اور آئی ایم ایف کی جانب سے نشاندہی کردہ 2 ارب ڈالر کے مالیاتی فرق پر دو طرفہ قرض دہندگان سے یقین دہانیاں حاصل کرنے کی آخری کوششیں جاری ہیں لیکن اگر یہ جاری ہفتہ بھی بغیر تصدیق کے گزر گیا تو پھر 7 ارب ڈالر کی توسیعی فنڈ سہولت پر آئی ایم ایف ایگزیکٹو بورڈ سے قرض کی منظوری حاصل کرنے کا امکان کم ہو جائے گا اور یہ معاملہ اکتوبر 2024ء تک مؤخر ہوسکتا ہے۔

بتایا جارہا ہے کہ پاکستان کو 2 ارب ڈالرز ایکسٹرنل فناننسنگ گیپ کا سامنا ہے، پاکستان 1اعشاریہ 75 ارب ڈالرز کے کمرشل قرض کے لیے درخواست کر چکا ہے پاکستان اسلامک ٹریڈ فنانس کارپوریشن سے 40 کروڑ ڈالرز قرض کی درخواست کر چکا ہے، اسلام آباد کی جانب سے اسلامک ڈیویلپمنٹ بینک سے 35 کروڑ ڈالرز قرض کی درخواست بھی کی جا چکی ہے.