ٹرمپ پرقاتلانہ حملہ کرنیوالے ریان ویزلی روتھ کے حوالے سے مزید تفصیلات سامنے آگئیں

واشنگٹن (اُردو پوائنٹ اخبارتازہ ترین - این این آئی۔ 16 ستمبر2024ء) قانون نافذ کرنے والے اداروں نے سابق صدر اور ری پبلکن صدارتی امیدوار ڈونلڈ ٹرمپ پر ممکنہ قاتلانہ حملے کو ناکام بناتے ہوئے مشتبہ شخص ریان ویزلی روتھ کو حراست میں لے لیا ہے۔غیر ملکی میڈیا کی رپورٹس کے مطابق سیکرٹ سروس کے ایجنٹوں نے 58 سالہ ملزم ریان ویزلی روتھ کو اس وقت حراست میں لیا جب گولف کورس کی حدود کے قریب فائرنگ کی گئی۔

(جاری ہے)

فیڈرل بیورو آف انویسٹی گیشن کے مطابق ٹرمپ اس وقت مبینہ حملہ آور سے تقریبا 275 سے 455 میٹر دور تھے۔امریکی حکام کا کہنا تھا کہ انہیں جائے وقوع سے ایک اے کے 47 طرز کی رائفل، ایک سکوپ، دو بیگ اور ایک گو پرو کیمرہ بھی ملا ہے۔ریان ویزلی روتھ سابق تعمیراتی کارکن ہے جو شمالی کیرولائنا کے علاقے گرینسبورو سے تعلق رکھتا ہے۔میڈیا رپورٹس کے مطابق زیرِ حراست شخص کا کوئی باضابطہ فوجی بیک گرانڈ نہیں ہے لیکن اس نے ماضی میں خاص طور پر 2022 میں یوکرین اور روس کی جنگ کے بعد سوشل میڈیا کے ذریعے یوکرین کی جانب سے جنگ میں حصہ لینے کی شدید خواہش کا اظہار کیا تھا۔