سپریم کورٹ، منشیات کیس میں عمر قید پانے والے دو ملزمان بری

مدعی پولیس افسر کا خود ہی تفتیشی افسر بننا انصاف کے اصولوں کیخلاف قرار،جسٹس جمال مندوخیل کی سربراہی میں 3 رکنی بنچ کا تحریری فیصلہ

جمعرات 7 مئی 2026 13:35

سپریم کورٹ، منشیات کیس میں عمر قید پانے والے دو ملزمان بری

اسلام آباد(اُردو پوائنٹ اخبارتازہ ترین - این این آئی۔ 07 مئی2026ء) سپریم کورٹ پاکستان نے منشیات کیس میں عمر قید پانے والے دو ملزمان کو بری کر دیا۔جسٹس جمال خان مندوخیل کی سربراہی میں 3 رکنی بنچ نے تحریری فیصلہ جاری کر دیا، فیصلے میں سپریم کورٹ نے مدعی پولیس افسر کا خود ہی تفتیشی افسر بننا انصاف کے اصولوں کے خلاف قرار دے دیا۔سپریم کورٹ نے فیصلے میں لکھا کہ منشیات مقدمات میں مدعی اور آئی او کا دوہرا کردار سختی سے حوصلہ شکنی کے مترادف ہے، مدعی ہمیشہ سزا دلوانے کی جانب مائل ہوتا ہے جس سے غیر جانبدار تفتیش ممکن نہیں رہتی، اپنی ہی ایف آئی آر کی کھلے ذہن سے تفتیش تقریباً ناممکن ہے۔

فیصلے میں مزید بتایا گیا کہ مدعی بطور آئی او صرف اپنے الزام ثابت کرنے والا ثبوت تلاش کر سکتا ہے، ایسی تفتیش انصاف کی فراہمی کے لیے نقصان دہ سمجھی جاتی ہے، مدعی کو آئی او مقرر کرنے کی ٹھوس وجوہ دینا لازمی ہیں بصورت دیگر استغاثہ کا مقدمہ کمزور ہو جاتا ہے۔

(جاری ہے)

سپریم کورٹ نے لکھا کہ تفتیش شفاف، غیر جانبدار اور قانون کے مطابق ہونا آئینی تقاضا ہے، آرٹیکل 10 اے کے تحت منصفانہ ٹرائل ہر ملزم کا بنیادی حق ہے جس پر سپریم کورٹ نے تفتیشی عمل، شواہد اور فرانزک طریقہ کار پر سنگین سوالات اٹھا دیے۔

فیصلے میں مزید لکھا گیا کہ عدالت میں پیش پارسلز پر ریکوری گواہ کے دستخط واضح نہ تھے، پراسیکیوشن یہ ثابت نہ کر سکی کہ عدالت میں پیش مواد وہی تھا جو برآمد ہوا، کیس پراپرٹی کی محفوظ تحویل اور لیبارٹری منتقلی کو بھی مشکوک قرار دے دیا گیا۔سپریم کورٹ نے فیصلہ میں بتایا کہ معمولی شک کا فائدہ بھی ملزم کو دینا فوجداری قانون کا مسلمہ اصول ہے، نچلی عدالتوں نے شواہد کا درست جائزہ نہیں لیا، ہائی کورٹ اور ٹرائل کورٹ کے فیصلے کالعدم قرار دے دیے گئے۔