ہاکی کھلاڑی نے والد کے انتقال کے باوجود پاکستان کیلئے میچ کھیلا اور تمغہ جتوایا

غضنفر علی کے والد کا تین دن قبل پاکستان میں انتقال ہوا تاہم انہوں نے وطن واپسی کے بجائے پاکستان کی خاطر میچ کھیلنے کا فیصلہ کیا

ذیشان مہتاب بدھ 18 ستمبر 2024 16:10

ہاکی کھلاڑی نے والد کے انتقال کے باوجود پاکستان کیلئے میچ کھیلا اور ..

لاہور (اردو پوائنٹ تازہ ترین اخبار ۔ 18 ستمبر 2024ء ) ایشین ہاکی چیمپئنز ٹرافی میں پاکستان ٹیم کے کھلاڑی غضنفر علی نے والد کی وفات کے باوجود ملک کی خاطر میچ کھیل کر پاکستان کو کانسی کا تمغہ جتوایا۔ چین میں کھیلی گئی ایشین ہاکی چیمپئنز ٹرافی میں پاکستان نے جنوبی کوریا کو ہرا کر تیسری پوزیشن حاصل کی اور کانسی کا تمغہ حاصل کیا جو گرین شرٹس نے اس ٹورنامنٹ میں 8 سال بعد جیتا۔

اس جیت میں جہاں پوری ٹیم کی کارکردگی نمایاں رہی وہیں ایک کھلاڑی غضنفر علی کا جذبہ بھی قابل ستائش رہا۔

(جاری ہے)

غضنفر علی جن کے والد کا تین دن قبل پاکستان میں انتقال ہوا تاہم قومی کھلاڑی نے وطن واپسی کے بجائے پاکستان کی خاطر میچ کھیلنے کا فیصلہ کیا۔ منگل کے روز قومی ہاکی ٹیم نے جنوبی کوریا کو دو کے مقابلے میں پانچ گول سے شکست دے کر تیسری پوزیشن حاصل کی۔ اس میچ میں محمد سفیان اور حنان شاہد نے دو، دو گول کیے۔ تمام کھلاڑیوں نے میڈل اور جیت کو غضنفر علی کے نام کر دیا ہے۔ واضح رہے کہ غضنفر علی کے والد محمد افضل کو اتوار کو گاؤں ڈینگ شاہ قصور میں سپرد خاک کیا گیا تھا۔