Live Updates

اینڈی پائی کرافٹ بھارتی ٹیم کیلئے فکس ریفری ہیں : رمیز راجہ

پائی کرافٹ بھارت کے 90 میچوں میں میچ ریفری رہے ہیں، مجھے لگتا ہے یہ بھارت کے فیورٹ میچ ریفری ہیں : سابق چیئرمین پی سی بی

ذیشان مہتاب جمعرات 18 ستمبر 2025 12:26

اینڈی پائی کرافٹ بھارتی ٹیم کیلئے فکس ریفری ہیں : رمیز راجہ

لاہور (اردو پوائنٹ تازہ ترین اخبار ۔ 18 ستمبر 2025ء ) پاکستان کرکٹ بورڈ (پی سی بی) کے سابق چیئرمین رمیز راجہ کا کہنا ہے کہ اینڈی پائی کرافٹ بھارتی ٹیم کے لیے فکس ریفری ہیں، وہ بھارت کے 90 میچوں میں میچ ریفری رہے ہیں، مجھے لگتا ہے یہ بھارت کے فیورٹ میچ ریفری ہیں۔

گزشتہ روز لاہور میں ایشا کپ اور اینڈی پائی کرافٹ سے متعلق چیئرمین پی سی بی محسن نقوی، رمیز راجہ اور نجم سیٹھی نے مشترکہ پریس کانفرنس کی۔

اس موقع پر محسن نقوی کا کہنا تھا کہ کچھ دیر پہلے میچ ریفری نے کپتان اور ٹیم منیجر سے معذرت کی ہے، آئی سی سی سے 14 ستمبر کے میچ میں خلاف ورزیوں کی انکوائری کی درخواست کی ہے، سابق چیئرمین نجم سیٹھی اور رمیز راجا سے صورتحال پر مشاورت کی۔

محسن نقوی نے کہا کہ اللّٰہ کا شکر ہے کہ پاکستان کی عزت برقرار رکھی، ٹیم سے امید ہے کہ اب پرفارم کرکے دکھائے گی۔

(جاری ہے)

سابق کپتان و پی سی بی چیف رمیز راجہ نے کہا کہ یہ پاکستان کی ایک فتح ہے، جو بھی جذبات مجروح ہوئے ہیں اب ٹیم کارکردگی دکھائے، اب سب کی توجہ کرکٹ پر ہونی چاہیے، کرکٹ کو کرکٹ ہی رہنا چاہیے سیاسی پلیٹ فارم نہیں۔

سابق چیئرمین پی سی بی نجم سیٹھی نے کہا کہ پی سی بی کا ہمیشہ موقف رہا ہے کہ کھیل میں سیاست نہیں ہونی چاہیے۔