پاکستان ٹیلی کمیونیکیشن اتھارٹی کے زیراہتمام چار روزہ 'ٹریننگ آف ٹرینرز' پروگرام کا انعقاد

اسلام آباد (اُردو پوائنٹ اخبارتازہ ترین - اے پی پی۔ 19 ستمبر2024ء) پاکستان ٹیلی کمیونیکیشن اتھارٹی (پی ٹی اے) نے چار روزہ 'ٹریننگ آف ٹرینرز' (ٹی او ٹی) پروگرام منعقد کیا جس میں پی ٹی اے، یونیسیف، ٹیلی نار پاکستان، نیشنل کمیشن برائے حقوق اطفال (این سی آر سی) اور این سی ای آر ٹی کے افسران نے شرکت کی۔ یہ پروگرام یونیسیف پاکستان کے ساتھ دستخط شدہ مفاہمتی یادداشت (ایم او یو) کا حصہ ہے اور بچوں کے آن لائن تحفظ کے لیے پی ٹی اے کے عزم کی عکاسی کرتا ہے۔

اس پروگرام کا مقصد بچوں کو درپیش آن لائن خطرات کے بارے میں آگاہی فراہم کرنا اور افسران کو ایسے ٹولز سے متعلق معلومات فراہم کرنا ہے جو والدین کو ان کے بچوں کی ڈیجیٹل سرگرمیوں کو محفوظ طریقے سے منظم کرنے میں ممد و معاون ثابت ہوسکے۔

(جاری ہے)

پی ٹی اے سے جمعرات کو جاری بیان کے مطابق یہ تربیت 10 روزہ تربیتی پروگرام کے تسلسل کا حصہ تھی جس کے تحت 15 ماسٹر ٹرینرز کو تربیت دی گئی تھی تاکہ وہ 210 فسیلیٹیٹرز کو طلباء، والدین اور اساتذہ کی ڈیجیٹل خواندگی اور آن لائن تحفظ کے فروغ کے لیے تربیت فراہم کریں۔

اس تربیت میں اہم موضوعات جیسے آن لائن سکیورٹی، ڈارک ویب کے خطرات اور انٹرنیٹ کے ذمہ دارانہ استعمال پر گفتگو کی گئی۔ ٹک ٹاک اور ٹیسنٹ کے ماہرین کی جانب سے متعلقہ پلیٹ فارمز پر حفاظتی ٹولز اور طریقہ کار کے بارے میں معلومات فراہم کی گئیں۔تربیتی سیشن سے خطاب کرتے ہوئے ڈاکٹر خاور صدیق کھوکھر، ممبر کمپلائنس اینڈ انفورسمنٹ پی ٹی اے نے بچوں کو ڈیجیٹل دنیا میں محفوظ رکھنے کے لیے مشترکہ کوششوں کی اہمیت پر زور دیا۔

انہوں نے اس عزم کا اعادہ کیا کہ پی ٹی اے والدین اور اساتذہ کو بچوں کے آن لائن تحفظ کے پیش نظر ضروری ٹولز فراہم کرنے اور انٹرنیٹ کے ذمہ دارانہ استعمال کو فروغ دینے کے لیے پرعزم ہے۔اس موقع پرممبر سی اینڈ ای پی ٹی اے، یونیسیف اور ٹیلی نار کے نمائندوں نے شرکاء میں سرٹیفکیٹس بھی تقسیم کیے۔