انوشکا شرما اور ویرات کوہلی کی کرکٹ کھیلتے ویڈیو وائرل، اپنے ہی قوانین کا اطلاق کر دیا

بال تین بار مس ہوگئی تو آپ آؤٹ ہوجاؤ گے: انوشکا ، بالی ووڈ اداکارہ بولر بن کر اپنے شوہر کے نقشِ قدم پر چلنے لگیں

ذیشان مہتاب جمعرات 3 اکتوبر 2024 12:01

انوشکا شرما اور ویرات کوہلی کی کرکٹ کھیلتے ویڈیو وائرل، اپنے ہی قوانین ..

ممبئی (اردو پوائنٹ تازہ ترین اخبار ۔ 3 اکتوبر 2024ء ) بالی ووڈ سٹار انوشکا شرما کی اپنے شوہر اور بھارتی کرکٹ ٹیم کے مایہ ناز بلے باز ویرات کوہلی کے ہمراہ کرکٹ کھیلنے کی ویڈیو وائرل ہوگئی۔ انوشکا شرما نے اپنے آفیشل انسٹاگرام ہینڈل پر اپنی اور ویرات کوہلی کی نئی ویڈیو پوسٹ کی جس میں وہ کرکٹر کو کرکٹ کے قوانین بتاتی نظر آئیں۔ انوشکا کہتی ہیں کہ مجھے لگتا ہے کہ میں آپ (ویرات) کو کرکٹ میں شکست دے سکتی ہوں لیکن شرط یہ ہے کہ آپ کو میرے قوانین کے مطابق کھیلنا ہوگا۔

اداکارہ قوانین کی بڑی سی فہرست کو پڑھنے لگتی ہیں اور بتاتی ہیں کہ اگر گیند تین بار مس ہوگئی تو آپ آؤٹ ہوجاؤ گے، اگر گیند تین بار جسم سے لگی تو بھی آؤٹ قرار دیا جائے گا۔ انوشکا شرما مزید قوانین بتانے لگتی ہیں تو ویرات کوہلی کہتے ہیں کہ مجھے قوانین اور اصول مت سکھاؤ، چلو کرکٹ کھیلو، جس پر اداکارہ کہتی ہیں کہ پانچواں قانون یہ ہے کہ جس کا بلا ہوگا وہی پہلے بیٹنگ کرے گا۔

(جاری ہے)

اہلیہ کی بات پر ویرات کوہلی کہتے ہیں کہ یہ کونسا قانون ہے، اس کے بعد کوہلی پہلی ہی گیند پر انوشکا کو بولڈ کردیتے ہیں، جسے اداکارہ ٹرائی گیند قرار دیتی ہیں۔ اس کے بعد، انوشکا اگلی ہی گیند پر دوبارہ بولڈ ہوجاتی ہیں تو وہ خود کو تسلی دینے کے لیے کہتی ہیں کہ میں تو بولر ہوں۔ جب ویرات کوہلی بیٹنگ کے لیے آتے ہیں تو پہلی ہی گیند پر چھکا جڑ دیتے ہیں جس پر اداکارہ اُنہیں گیند ڈھونڈ کر لانے کا کہتی ہیں لیکن آخر میں کوہلی تنگ آکر وہاں سے چلے جاتے ہیں۔

واضح رہے کہ مذکورہ ویڈیو بھارت کے برانڈ کی تشہیر کے لیے بنائی گئی تھی جسے مداحوں کی جانب سے بہت پسند کیا جارہا ہے۔