Live Updates

ملتان ٹیسٹ: پاکستان نے پہلے دن انگلینڈ کیخلاف 4 وکٹوں پر 328 رنز سکور کرلیے

شان مسعود اور عبداللہ شفیق کی سنچریاں ، بابر اعظم ایک بار پھر بڑی اننگز کھیلنے میں ناکام

ذیشان مہتاب پیر 7 اکتوبر 2024 17:33

ملتان (اردو پوائنٹ تازہ ترین اخبار ۔ 7 اکتوبر 2024ء ) پہلے ٹیسٹ میچ کی پہلی اننگز میں میزبان انگلینڈ کے خلاف دن کے اختتام پر پاکستان نے 4 وکٹوں کے نقصان پر 328 رنز مکمل کر لیے۔ ملتان جاری ٹیسٹ میں پاکستان نے ٹاس جیت کر بیٹنگ کا فیصلہ کیا۔ اوپنر صائم ایوب 4 رنز بنا کر پویلین لوٹ گئے۔ صائم ایوب کے جلد آؤٹ ہونے کے بعد کپتان شان مسعود اور اوپنر عبداللہ شفیق نے دوسری وکٹ کی شراکت میں 253 رنز بنائے۔

یہاں عبداللہ شفیق 102 رنز بنا کر آؤٹ ہوگئے، انہوں نے ٹیسٹ میں اپنی 5ویں سنچری بنائی۔ عبداللہ شفیق کے آؤٹ ہونے کے بعد کپتان شان مسعود بھی زیادہ دیر وکٹ پر ٹہر سکے اور 151 رنز بنا کر وکٹ گنوا بیٹھے۔ انہوں نے 4 سال بعد کیریئر کی 5ویں سنچری اسکور کی جس میں 10 چوکے اور 2 چھکے شامل تھے۔

(جاری ہے)

شان مسعود نے 28 اننگز پہلے انگلینڈ کے خلاف 2020ء میں سنچری بنائی تھی جبکہ دوسری مرتبہ انگلینڈ کے خلاف 150 رنز کی اننگز کھیلی ہے۔

تجربہ کار بلے باز بابر اعظم دن ختم ہونے سے تھوڑی دیر قبل 30 رنز بنا کر ووکس کی گیند پر ایل بی ڈبلیو آئوٹ ہوئے، اس وقت سعود شکیل اور نسیم شاہ وکٹ پر موجود ہیں۔ یاد رہے کہ انگلینڈ ٹیسٹ ٹیم کے کپتان بین اسٹوکس کی غیر موجودگی میں اولی پوپ ٹیم کی قیادت کررہے ہیں جب کہ بیٹے کی پیدائش کے باعث بنگلہ دیش کے خلاف دوسرے ٹیسٹ میچ سے ڈراپ کیے جانے والے قومی فاسٹ باؤلر شاہین شاہ آفریدی کی ٹیم میں واپسی ہوئی ہے۔

ٹاس کے موقع پر گفتگو کرتے ہوئے پاکستان کرکٹ ٹیم کے کپتان شان مسعود نے کہا کہ ہمارے پاس ٹیم میں 2 اسپنر اور 3 فاسٹ باؤلرز ہیں، انگلش کپتان اولی پوپ نے کہا کہ ہم بھی ٹاس جیت کر پہلے بیٹنگ کرنے کا فیصلہ ہی کرتے۔ پاکستان پلینگ الیون میں شان مسعود (کپتان) ، صائم ایوب، عبداللہ شفیق، بابر اعظم، سعود شکیل، محمد رضوان (وکٹ کیپر)، سلمان علی آغا، عامر جمال، شاہین شاہ، نسیم شاہ اور ابرار احمد شامل ہیں۔ انگلینڈ پلینگ الیون میں اولی پوپ (کپتان)، زیک کرالی، بین ڈکٹ، جو روٹ، ہیری بروک، جیمی اسمتھ (وکٹ کیپر)، کرس ووکس، گس ایٹکنسن، برائیڈن کارس(ڈیبیو)، جیک لیچ اور شعیب بشیر شامل ہیں۔