پاک آرمی کی ٹیم نے برطانیہ میں منعقدہ کیمبرین پیٹرول مشق 2025 میں گولڈ میڈل حاصل کرلیا

پیر 13 اکتوبر 2025 22:53

راولپنڈی(اُردو پوائنٹ اخبارتازہ ترین - این این آئی۔ 13 اکتوبر2025ء) پاک آرمی کی ٹیم نیبرطانیہ میں منعقدہ کیمبرین پیٹرول مشق ط 2025 میں گولڈ میڈل حاصل کیا ہے۔ پیر کو پاک فوج کے شعبہ تعلقات عامہ (آئی ایس پی آر )سے جاری بیان کے مطابق پاکستان آرمی کی ٹیم نے 03 سے 13 اکتوبر 2025 تک ویلز برطانیہ میں منعقد ہونے والی ایکسرسائز کیمبرین پیٹرول 2025 میں گولڈ میڈل حاصل کیا۔

یہ ایکسرسائز کیمبرین پیٹرول 66 سال سے منعقد کی جارہی ہے، مشق میں پیشہ ورانہ معیار کو برقرار رکھا گیا۔

(جاری ہے)

پوری دنیا سے مشق کے شرکا کو نا ہموار علاقے میں حکمت عملی کے ساتھ آگے بڑھنا پڑا، 48 گھنٹوں کے دوران 60 کلومیٹر کا فاصلہ طے کرتے ہوئے انہوں نے مسابقتی ماحول میں ماہرانہ انداز میں اپنے اہداف حاصل کئے۔ رواں سال مشق میں 36 ممالک کی 137 ٹیموں نے حصہ لیا اور ان تمام ٹیموں میں سے کیپٹن محمد سعد کی قیادت میں پاک فوج کی ٹیم نے مشق میں غیر معمولی کارکردگی کا مظاہرہ کیا اور گولڈ میڈل حاصل کیا۔

آئی ایس پی آر نے کہا ہے کہ یہ واقعی پوری قوم اور پاک فوج کے لیے قابل فخر لمحہ ہے جو اپنی پیشہ ورانہ مہارت اور تربیت کے اعلیٰ ترین معیار کے لیے جانی جاتی ہے۔ پاک فوج نے ہمیشہ ملک کا پرچم سربلند رکھا ہے اور آئندہ بھی کوششیں جاری رکھے گی۔