مولانا فضل الرحمن کے حکم پر احتجاج کرنے کے لیے تیار ہیں، جمعیت علماء اسلام صوبہ سندھ

ہفتہ 14 دسمبر 2024 22:55

جیکب آباد (اُردو پوائنٹ اخبارتازہ ترین - این این آئی۔ 14 دسمبر2024ء) جمعیت علماء اسلام صوبہ سندھ نے 26 ویں آئینی ترمیم میں حکومت کی جانب سے وعدہ خلافی پر غصہ کا اظہار کرتے ہوئے کہا کہ مولانا فضل الرحمن کے حکم پر احتجاج کرنے کے لیے تیار ہیں، حکومت کو وعدہ خلافی مہنگی پڑے گی، جے یو آئی مفاہمتی پالیسی پر یقین رکھتی ہے لیکن حکمران ہمیں مزاحمتی پالیسی کی طرف لے جارہے ہیں، جے یو آئی کے کارکنان احتجاج کے لیے تیار رہیں۔

جے یو آئی سندھ کی صوبائی مجلس عاملہ، سکھر، لاڑکانہ ڈویژن سمیت دادو اور نوشہرو فیروز اضلاع کے صدور اور جنرل سیکریٹریز کے صوبائی امیر مولانا عبدالقیوم ہالیجوی کی صدارت میں ہونے والے مشترکہ اجلاس میں جے یو آئی سندھ کے سیکریٹری جنرل راشد محمود سومرو نے خطاب کرتے ہوئے کیا ۔

(جاری ہے)

اجلاس میں مولانا سید سراج احمد شاہ امروٹی ، مفتی سعود افضل ہالیجوی ، مولانا محمد صالح انڈھڑ، ڈاکٹر اے جی انصاری، مولانا محمد رمضان پھلپوٹو، مولانا محمد اسحاق لغاری ، مولانا میر محمد میرک سمیت دیگر نے خطاب کیا۔

اجلاس سے صوبائی امیر مولانا عبدالقیوم ہالیجوی نے خطاب کرتے ہوئے مزید کہا کہ شہید ڈاکٹر خالد محمود سومرو کے کیس میں عدالت پر مکمل اعتماد کرتے ہیں اور امید کرتے ہیں کہ عدالت جلد اس کیس میں ملوث ملزمان کو سزا دیکر انصاف فراہم کرے گی، انہوں نے سندھ کی وکلاء برادری کو اپیل کی کہ وہ 20 دسمبر کو شہید ڈاکٹر علامہ خالد محمود سومرو کیس کے فتویٰ کے دن سکھر سینٹرل جیل میں جائزے کے لیے شرکت کریں، انہوں نے کہا کہ 16 دسمبر کو سندھ بھر کے تمام مدارس میں شہید ڈاکٹر خالد محمود سومرو کے کیس میں انصاف کے لیے خصوصی دعائیں کی جائیں گی، جبکہ آج سے گھروں میں مسلسل فرض نماز کے بعد ورد اور صدقہ روزہ کا اہتمام کیا جائے گا، انہوں نے کہا کہ عدالت کا کوئی بھی فیصلہ آئے ہم کارکنان سے اپیل کرتے ہیں کہ پرامن رہیں اور قانونی راستے کو ہم بہتر سمجھتے ہیں۔