قائداعظم محمد علی جناح کے یوم پیدائش پر چیئرمین جوائنٹ چیفس آف سٹاف کمیٹی ، سروسز چیفس اور افواج پاکستان کا بابائے قوم کو خراج عقیدت پیش

بدھ 25 دسمبر 2024 01:50

راولپنڈی (اُردو پوائنٹ اخبارتازہ ترین - اے پی پی۔ 25 دسمبر2024ء) قائداعظم محمد علی جناح کے یوم پیدائش کے پرمسرت موقع پر چیئرمین جوائنٹ چیفس آف سٹاف کمیٹی (CJCSC)، سروسز چیفس اور افواج پاکستان نے بابائے قوم کو خراج عقیدت پیش کیا۔آئی ایس پی آر کی جانب سے جاری ہونے والے ایک بیان میں کہا گیا ہے کہ مسلح افواج قائداعظم کے پائیدار وژن اور بے مثال قیادت کو خراج تحسین پیش کرتی ہیں، جن کی انتھک کوششوں نے ہمارے عوام کو متحد کیا اور ایک خودمختار اور آزاد پاکستان کی بنیاد رکھی۔

(جاری ہے)

قومی اہمیت کے اس دن پر، ہم قائد کے اتحاد، یقین محکم اور تنظیم کے رہنما اصولوں کے لیے اپنی غیر متزلزل وابستگی کی تجدید کرتے ہیں، جو قوم کو متاثر کرتے رہتے ہیں۔مزید برآںمسلح افواج کرسمس کے پر مسرت موقع پر مسیحی برادری کو دلی مبارکباد پیش کرتی ہے۔ اپنے مسیحی بھائیوں اور بہنوں کے ساتھ یکجہتی کے طور پر، ہم محبت، ہمدردی اور امن کی عالمی اقدار کا جشن مناتے ہیں جن کی یہ موقع نمائندگی کرتا ہے۔بیان میں کہا گیا ہے کہ پاکستان کی مسلح افواج قوم کی حفاظت اور اپنے عوام اور وطن کی خدمت میں انصاف، مساوات اور ہم آہنگی کے نظریات کو برقرار رکھنے کے لیے پرعزم ہیں۔