موٹر سائیکل کے برابر جسامت والی مچھلی 36 کروڑ 25 لاکھ روپے میں نیلام

جاپان کی سب سے بڑی فش منڈی میں بڑی جسامت والی مچھلی کو مشہور ریسٹورنٹ نے نیلامی میں خریدا

منگل 7 جنوری 2025 14:10

موٹر سائیکل کے برابر جسامت والی مچھلی 36 کروڑ 25 لاکھ روپے میں نیلام

ٹوکیو(اُردو پوائنٹ اخبارتازہ ترین - این این آئی۔ 07 جنوری2025ء)جاپانی مچھلی بازار میں نئے سال کے آغاز پر موٹر سائیکل کے برابر جسامت والی مچھلی نیلام کردی گئی۔میڈیارپورٹس کے مطابق جاپان کے سب سے بڑے مچھلی بازار ٹوکیو کے تویوسو فش مارکیٹ میں نئے سال کی نیلامی کے دوران ایک موٹرسائیکل جتنی بلو فن ٹونا کو 13 لاکھ ڈالرز(تقریبا 36 کروڑ 25 لاکھ سے زائد پاکستانی روپی)میں فروخت کیا گیا، جو ریکارڈ پر دوسری سب سے بڑی نیلامی ہے۔

اس بڑی جسامت والی مچھلی کا وزن 608 پانڈ تقریبا 276 کلوگرام ہے، جسے جاپان کی ایک مشہور ریسٹورنٹ چین نے نیلامی میں خریدا ہے۔جاپانی میڈیا کے مطابق یہ قیمت 1999 سے جاری ریکارڈ میں دوسری سب سے بڑی بولی ہے، سب سے زیادہ قیمت 2019 میں 278 کلوگرام وزنی ٹونا کے لیے 31 لاکھ ڈالرز تھی۔

(جاری ہے)

واضح رہے کہ ٹوکیو کی مچھلی مارکیٹ میں زیادہ تر دنوں میں ملک بھر سے آنے والے وینڈرز بہترین مچھلیاں نیلامی کے لیے پیش کرتے ہیں، تاہم نئے سال کی نیلامی اہمیت رکھتی ہے۔

اس موقع پر خریدار سال کی پہلی نیلامی کا اعزاز حاصل کرنے کیلیے ایک دوسرے پر سبقت لینے کی کوشش کرتے ہیں۔ماہرین کے مطابق بلو فن ٹونا دنیا کی سب سے بڑی ٹونا نسل ہے، جو 40 سال تک زندہ رہ سکتی ہے اور وزن میں 1,500 پانڈ تک پہنچ سکتی ہے۔بدقسمتی سے زیادہ شکار اور غیر قانونی ماہی گیری کے باعث ان کی آبادی میں شدید کمی آئی ہے، جس کے نتیجے میں یہ نسل معدومیت کے خطرے سے دوچار ہوگئی ہے۔