پائیدار اقتصادی ترقی کےلئے زرعی شعبے میں جدت کو فروغ دینا ہو گا،وائس چانسلر جامعہ زرعیہ فیصل آباد

جمعہ 10 جنوری 2025 12:24

فیصل آباد (اُردو پوائنٹ اخبارتازہ ترین - اے پی پی۔ 10 جنوری2025ء) جامعہ زرعیہ فیصل آباد کے وائس چانسلرڈاکٹر محمد سرورخان نے کہا ہے کہ پائیدار اقتصادی ترقی کے لئے زرعی شعبے میں جدت کو فروغ دینا ہو گا۔ انہوں نے پروفیشنل ٹریننگ اینڈ سکل ڈویلپمنٹ سینٹر کے زیر اہتمام محکمہ زراعت پنجاب کے افسران کےلئے جاری فنانس، ایڈمنسٹریشن مینجمنٹ اور ای گورننس کے عنوان سے منعقدہ ورکشاپ کے شرکاسے خطاب کرتے ہوئے کہا کہ زرعی شعبے کو مختلف چیلنجز جیسےکم پیداوار، پانی کی کمیابی، زمین کی زرخیزی،موسمیاتی تبدیلیوں کا سامنا ہے لہٰذاجدید رجحانات و زرعی ٹیکنالوجی کو عام کاشتکار تک پہنچانا وقت کی اہم ضرورت ہے جس سے زرعی خوشحالی کا نیا باب مرتب ہو گا۔

انہوں نے کہا کہ یونیورسٹی ٹھوس تحقیقی کام، نئی اقسام، آؤٹ ریچ اور ہنر مند افرادی قوت کے ذریعے زرعی مسائل کو حل کرنے کے لئے ہر ممکن کوشش کر رہی ہے کیونکہ ملک کی ترقی کا انحصار اسی شعبے پر ہے۔

(جاری ہے)

ڈائریکٹر پروفیشنل ٹریننگ اینڈ سکل ڈویلپمنٹ سینٹر پروفیسر ڈاکٹر وقاص وکیل نے کہا کہ یہ محکمہ زراعت کے افسران کے لئے 22ویں ورکشاپ ہے جو ان کی ترقی کےلئے لازمی قرار دی گئی ہے۔ انہوں نے کہا کہ پروفیشنل ٹریننگ سینٹر زراعت، لائیو سٹاک اور دیہی ترقی پر خصوصی توجہ کےساتھ 250 شارٹ کورسز سکلز ڈویلپمنٹ پیش کر رہا ہے۔ انہوں نے کہا کہ زرعی افسران کی تربیت کے تحت اپنے شعبے کے نامور ریسورس پرسنز شرکا کو تربیت فراہم کر رہے ہیں۔