ِسابق خاتون اول ریحام خان نے 190 ملین پانڈز کی واپسی کے فیصلے کو اہم پیش رفت قرار دے دیا

u فیصل آباد(اُردو پوائنٹ اخبارتازہ ترین - آن لائن۔ 18 جنوری2025ء)معروف صحافی اور سابق خاتون اول ریحام خان نے 190 ملین پانڈز کی واپسی کے فیصلے کو اہم پیش رفت قرار دیتے ہوئے کہا کہ عمران خان اور بشری بی بی کی سزائیں قانون کے مطابق ہیں اور نو مئی کے واقعات سے متعلق بھی مزید فیصلے جلد آئیں گے کیونکہ ملکی سالمیت پر حملے کو برداشت نہیں کیا جا سکتا، فیصل آباد پاکستان کی معیشت کی ریڑھ کی ہڈی ہیلیکن حکومتی عدم توجہ کے باعث کئی صنعتیں بند ہو چکی ہیں، آن لائن کے مطا بق ان خیا لات کا اظہار انہوں نے گزشتہ روز فیصل آباد پریس کلب کے دورہ کے دورانمیڈیا سے گفتگو کرتے ہوئے کیا، انہوں نے صدر پریس کلب شاہد علی، سیکرٹری سید عزادار حسین عابدی اور نئی منتخب کابینہ کے تمام عہدیداران کو مبارکباد پیش کی۔

(جاری ہے)

ریحام خان نے خواتین کی نمائندگی کو خوش آئند قرار دیتے ہوئے کہا کہ خواتین لاونج کا قیام ایک مثالی قدم ہے جس کی تقلید دوسرے پریس کلبز کو بھی کرنی چاہیے۔ انہوں نے کہا کہ فیصل آباد پریس کلب ہمیشہ انہیں گرمجوشی سے خوش آمدید کہتا آیا ہے اور یہ کلب صحافت کی دنیا میں ایک اہم مقام رکھتا ہے۔انہوں نے صحافیوں کو درپیش مسائل پر روشنی ڈالتے ہوئے کہا کہ رپورٹرز، کیمرہ مین اور دیگر میڈیا کارکنان کو ان کے حقوق دیے جانے چاہئیں۔

خاص طور پر تنخواہوں کی بروقت ادائیگی اور صحافیوں کے لیے رہائشی پلاٹس کی فراہمی کے وعدے پورے کرنے کی ضرورت ہے۔ 190 ملین پانڈز کی واپسی کے فیصلے کو اہم پیش رفت قرار دیتے ہوئے انہوں نے کہا کہ عمران خان اور بشری بی بی کی سزائیں قانون کے مطابق ہیں اور نو مئی کے واقعات سے متعلق بھی مزید فیصلے جلد آئیں گے کیونکہ ملکی سالمیت پر حملے کو برداشت نہیں کیا جا سکتا۔

ریحام خان نے فیصل آباد کی انڈسٹری پر تشویش کا اظہار کرتے ہوئے کہا کہ یہ پاکستان کی معیشت کی ریڑھ کی ہڈی ہے لیکن حکومتی عدم توجہ کے باعث کئی صنعتیں بند ہو چکی ہیں۔ انہوں نے صنعتکاروں کو سہولیات فراہم کرنے اور مقامی مصنوعات کو عالمی سطح پر بہتر شناخت دینے پر زور دیا۔ انہوں نے کہا کہ ڈیجیٹل میڈیا دورِ حاضر کا سب سے مثر پلیٹ فارم بن چکا ہے لیکن پاکستان اس میدان میں پیچھے ہے۔

سائبر ماہرین کی کمی اور ڈیجیٹل میڈیا کے جدید رجحانات کو اپنانے کی ضرورت پر زور دیا۔ ماحولیاتی مسائل پر بات کرتے ہوئے انہوں نے کہا کہ آلودگی عوامی صحت اور انڈسٹری کے لیے بڑا چیلنج ہے۔ انہوں نے کسانوں کو سہولتوں کی فراہمی کو دیہی معیشت کی بہتری کے لیے ناگزیر قرار دیا۔دورے کے اختتام پر ریحام خان نے خواتین لاونج کا وزٹ کیا اور وومن جرنلسٹس کی عہدیداران، جن میں سیکرٹری ردا سندھو، سینئر نائب صدر منیبہ فاطمہ، چیف آرگنائزر افشاں بتول، انفارمیشن سیکرٹری ثوبیہ مظہر اور ایگزیکٹو ممبران رمشا طارق اور شازیہ نعیم شامل ہیں، سے ملاقات کی۔

انہوں نے خواتین صحافیوں کو مزید مواقع فراہم کرنے کی ضرورت پر زور دیا اور پاکستان وومن جرنلسٹس فورم میں اپنی شمولیت کا اعلان کیا۔ ریحام خان نے فیصل آباد پریس کلب کی جانب سے خواتین کی نمائندگی اور ان کے لیے کیے گئے اقدامات کو سراہتے ہوئے کہا کہ یہ ملک میں صحافت کے فروغ کے لیے ایک قابلِ تقلید مثال ہے۔