Live Updates

آپ کو پتہ ہے پی ٹی آئی دور میں پٹرول کی قیمتیں 400 روپے تک چلی گئی تھیں، حنا پرویز بٹ کا ویڈیو کلپ وائرل

میڈیا ٹاک کے دوران مسلم لیگ ن کی رکن پنجاب اسمبلی سے پیٹرولیم مصنوعات کی قیمتوں میں اضافے سے متعلق سوال ہوا تھا

ساجد علی پیر 16 جون 2025 17:01

آپ کو پتہ ہے پی ٹی آئی دور میں پٹرول کی قیمتیں 400 روپے تک چلی گئی تھیں، ..

لاہور ( اُردو پوائنٹ اخبارتازہ ترین۔ 16 جون 2025ء ) مسلم لیگ ن کی رکن پنجاب اسمبلی حنا پرویز بٹ کا تحریک انصاف کے دور میں پیٹرول کی قیمتوں سے متعلق ویڈیو کلپ سوشل میڈیا پر وائرل ہوگیا۔ لاہور میں میڈیا سے گفتگو کے دوران جب ان سے پیٹرولیم مصنوعات کی قیمتوں میں اضافے سے متعلق سوال کیا گیا تو اس کے جواب میں حنا پرویز بٹ نے کہا کہ میں یہ چیک کر رہی تھی اور آپ کو پتہ ہے پی ٹی آئی کے دور میں پٹرول کی قیمتیں 400 روپے تک چلی گئی تھیں ابھی کافی کم ہیں۔

انہوں نے مزید کہا کہ ہم وعدہ کرتے ہیں کہ اس بجٹ میں عوام کو بھی ریلیف ملے گا، ملازمین کی تنخواہوں میں بھی اضافہ ہوگا، پنشن بڑھے گی، ہم ممکن بنائیں گے کہ مزدور کی کم از کم اجرت کو بڑھایا جائے، زرعی اصلاحات کی جائیں اور کسانوں کو فائدہ دیا جائے، بچوں کی بہتر تعلیم مہیا کی جائے اور سکالر شپس دی جائیں، نوجوانوں کے لیے انٹرن شپ پروگرام شروع کیے جائیں، کھیلوں کے لیے بچوں کو بہتر سے بہتر سہولیات دیں گے۔

(جاری ہے)

خیال رہے کہ وفاقی حکومت کی جانب سے ملک میں آئندہ 15 روز کے لیے پیٹرولیم مصنوعات کی قیمتوں میں اضافہ کیا گیا ہے، جس کا نوٹی فکیشن بھی جاری کردیا گیا، جس سے معلوم ہوا ہے کہ پیٹرول کی فی لٹر قیمت میں 4 روپے 80 پیسے اور ہائی سپیڈ ڈیزل ڈیزل کی قیمت 7 روپے 95 پیسے بڑھائی گئی ہے، اس اضافے کے ساتھ ہی ملک میں پیٹرول کی نئی قیمت 258 روپے 43 پیسے فی لیٹر جب کہ ہائی سپیڈ ڈیزل کی نئی قیمت 262 روپے 59 پیسے فی لیٹر ہوچکی ہے۔