فیصل آباد،کاشتکاروں کو بھنڈی کی پہلی فصل کی کاشت وسط فروری سے مارچ کے آخر تک مکمل کرنے کی ہدایت

پیر 20 جنوری 2025 17:00

فیصل آباد (اُردو پوائنٹ اخبارتازہ ترین - اے پی پی۔ 20 جنوری2025ء) محکمہ زراعت نے کاشتکاروں کو بھنڈی کی پہلی فصل کی کاشت وسط فروری سے مارچ کے آخر تک مکمل کرنے کی ہدایت کی ہے۔ ڈائریکٹر محکمہ زراعت توسیع فیصل آباد چوہدری خالد محمودنے بتا یا ہے کہ پنجاب کے مختلف اضلاع میں بھنڈی کی اوسط پیداوار 120من فی ایکڑ تک پہنچ گئی ہے جبکہ گزشتہ سال13ہزار ایکڑ سے زائد رقبہ پر بھنڈی کی کاشت سے59 ہزار ٹن پیداوار حاصل ہوئی۔

انہوں نے کہا کہ بھنڈی موسم گرما کی ہر دلعزیز سبزی ہے جس کی کاشت کے لئے گرم مرطوب آب وہوا کی ضرورت ہوتی ہے کیونکہ یہ فصل کہرکے اثرات کو برداشت نہیں کرسکتی۔ انہوں نے بتایاکہ بھنڈی کی فصل سال میں 2مرتبہ کاشت کی جاتی ہے لہٰذا کاشتکاروں کو چاہیے کہ وہ پہلی فصل کی کاشت وسط فروری سے مارچ کے آخر تک مکمل کریں جبکہ دوسری بار یہ فصل جون اور جولائی میں مکمل کی جاسکتی ہے۔

(جاری ہے)

انہوں نے کہاکہ بھنڈی کی منظور شدہ قسم سبزی پری ہے جس کی بوائی کے لئے اچھی اگاؤ والا 10 سے 12 کلوگرام بیج فی ایکڑ استعمال کیاجاسکتاہے تاہم بیج کی فصل کا شت کرنے کےلئے بھنڈی کا 6کلوگرام بیج فی ایکڑ ہی کافی ہے۔ انہوں نے بتایاکہ بھنڈی کی فصل 20 سے 30ڈگری سینٹی گریڈ درجہ حرارت پر بہترین اگاؤ اور بڑھوتری فراہم کرتی ہے۔ انہوں نے کہاکہ بھنڈی توری کو ہر قسم کی زمین میں کاشت کیا جاسکتا ہے البتہ زرخیز میرا اور پانی کے بہتر نکاس والی زمین جس کی تیزابی خاصیت6 سے 6.8 ہو بہترین پیداوار کےلئے موزوں ہے۔