فیصل آباد،کاشتکاروں کو زیادہ سے زیادہ رقبے پرمونگ پھلی کاشت کرنے کی ہدایت

جمعرات 23 جنوری 2025 15:30

فیصل آباد (اُردو پوائنٹ اخبارتازہ ترین - اے پی پی۔ 23 جنوری2025ء) محکمہ زراعت نے کاشتکاروں کو زیادہ سے زیادہ رقبے پرمونگ پھلی کاشت کرنے کی ہدایت کی ہے۔ نظامت زرعی اطلاعات محکمہ زراعت کے ترجمان نے کہا ہے کہ پنجاب میں گزشتہ سال 212730ایکڑ رقبہ پر مونگ پھلی کی کاشت سے 89980ٹن پیداوار حاصل ہوئی تاہم اس پیداوار میں بھرپور اضافہ کی گنجائش موجود ہے۔

انہوں نے کہا کہ پنجاب میں مونگ پھلی کے زیر کاشت رقبہ میں سے87فیصد چکوال،اٹک اور راولپنڈ ی میں کاشت ہوتا ہے۔انہوں نے کہا کہ مونگ پھلی کے بیج میں 44سے56فیصد اعلیٰ معیار کا خوردنی تیل اور22سے30فیصد لحمیات پائے جاتے ہیں جبکہ مونگ پھلی کے خوردنی تیل کے استعمال کو فروغ دے کر ملکی ضروریات کو پورا کرنے سمیت ہر سال خوردنی تیل کی درآمد پر خرچ ہونے والے قیمتی زرمبادلہ کی بچت بھی ہوسکتی ہے۔

(جاری ہے)

انہوں نے مونگ پھلی کی کاشت کے علاقوں میں کاشتکاروں کو زیادہ سے زیادہ رقبے پرمونگ پھلی کاشت کرنے کی ہدایت کرتے ہوئے کہا کہ کاشتکار مونگ پھلی کی ترقی دادہ اقسام باری 2000،بارڈ 479،گولڈن اور باری 2011کی کاشت سے بھرپور پیداوار حاصل کرسکتے ہیں۔انہوں نے کہا کہ اگرچہ ہمارے مونگ پھلی کی کاشت کے علاقوں میں پیداواری صلاحیت 40من فی ایکڑ ہے مگر ہمارے کاشتکار اوسطاً6سے 10من فی ایکڑ پیداوار حاصل کررہے ہیں جس میں جدید پیداواری ٹیکنالوجی کے ذریعے مزید اضافہ کیاجاسکتاہے۔