وزیر زراعت سید عاشق حسین کرمانی سے چائنا کمپنی کے وفد کی ملاقات،آرگینک فرٹیلائزر، کپاس کے بیج، سویابین، چاول اور مکئی کے پرمیئم بیجوں بارے تبادلہ خیال

لاہور (اُردو پوائنٹ اخبارتازہ ترین - اے پی پی۔ 27 جنوری2025ء) وزیر زراعت و لائیو سٹاک پنجاب سید عاشق حسین کرمانی سے چائنا (بیجنگ) کی کمپنی بی جی آئی گروپ کے وفد نے چئیرمین ڈاکٹر وانگ جائن(Wang Jian) کی سربراہی میں زراعت ہائوس لاہور میں ملاقات کی ۔ملاقات کے دوران سیکرٹری زراعت پنجاب افتخار علی سہو بھی موجود تھے۔ملاقات کے دوران آرگینک فرٹیلائزر،کپاس کے بیج، چاول اور مکئی کے پرمئیم بیج کے حوالے سےتبادلہ خیال کیا گیا۔

اس موقع وزیر زراعت و لائیو اسٹاک پنجاب سید عاشق حسین کرمانی نے کہا کہ پنجاب زرعی ٹیکنالوجی کے فروغ کیلئے چائنا کی جدید زرعی ریسرچ اور ٹیکنالوجی سے استفادہ حاصل کرنے کا خواہاں ہے۔انہوں نے کہا کہ صوبہ میں کپاس کے فروغ کیلئے جی ایم اوٹیکنالوجی اور جین ایڈیٹنگ میں چائنا کے تجربات سے مستفید ہونا چاہتے ہیں۔

(جاری ہے)

صوبہ میں کپاس کی ترویج کیلئے کیڑوں، بیماریوں اور موسمی تبدیلیوں کو برداشت کرنے والی جدید نئی اقسام کے حامل ہائبرڈ بیج کافروغ وقت کی اہم ضرورت ہے۔

حکومت پنجاب زرعی لینڈ پر آرگینک کھادوں کے فروغ اور باہمی تجربات کی شئیرنگ کیلئے مکمل تعاون فراہم کرے گی۔صوبہ میں سویابین، مکئی اور چاول کی فی ایکڑ زیادہ پیداوار اور بہتر کوالٹی کے حصول کیلئے پرمئیم بیج کی بی جی آئی کمپنی سے دستیابی درکار ہے۔وزیر زراعت پنجاب نے مزید کہا کہ دونوں ممالک کے درمیانی قریبی دوستانہ تعلقات ہیں۔ جدید زرعی ریسرچ اور لیبارٹریوں کے قیام کیلئے مل کام کرنا از حد ضروری ہے۔

اس موقع پر سیکرٹری زراعت پنجاب افتخار علی سہو نے کہا کہ جدید زرعی ریسرچ کو فروغ دینے کیلئے دونوں ممالک کے زرعی سائنسدانوں اور ماہرین کے دورے کرائے جائیں گے جہاں وہ ایک دوسرے کے تجربات سے فائدہ اٹھائیں گے۔اس موقع پر چیئرمین بی جی آئی ڈاکٹر وانگ جائن نے کہا کہ بی جی آئی گروپ فصلوں کو خشک سالی سے بچانے کیلئے پرعزم ہے اور جینومکس ٹیکنالوجی کے ذڑیعے صحرا کے ماحول کے مطابق نئی اقسام تیار کر رہا ہے۔

ان کی کمپنی صوبہ پنجاب میں زرعی شعبہ کی ترقی کیلئے اپنا تعاون فراہم کرے گی۔صوبہ پنجاب میں پائلٹ پراجیکٹ لانچ کر کے آرگینک کھادوں کے استعمال سے کم پیداواری لاگت کے ذریعے زرعی پیداوار میں اضافہ کیا جائے گا۔اس کے علاوہ باہمی تعاون سے پنجاب کے سائنسدانوں کو جدید زرعی ٹیکنالوجی بارے تربیت فراہم کی جائے گی اور لیبارٹرریوں کو آپریشنل کیا جائے گا۔

اس موقع پر چائنا کے وفد سے نائب صدر بی جی آئی گروپ ڈاکٹر لی ننگ(Dr. Li Ning)،نائب صدر فار گلوبل ڈویلپمنٹ مسٹر ٹیرنس ژیانگ(Mr. Terence Xiong)، چیف نمائندہ فار ساتھ ایسٹ ایشیا مسٹر جیرمی کا(Mr. Jeremy Cao)،اسسٹنٹ ٹو چئیرمین بی جی آئی گروپ مسز ڈونگ یای(Mrs. Dong Yiwei) اور چیف نمائندہ فار پاکستان ما ژی یائے(Mr. Mao Zhixia) شامل تھے جبکہ محکمہ زراعت پنجاب سے کنسلٹنٹ محکمہ زراعت پنجاب ڈاکٹر انجم علی، ڈائریکٹر جنرلز زراعت چوہدری عبدالحمید، نوید عصمت کاہلوں موجود تھے ۔چیف ایگزیکٹو آفیسر پارب ڈاکٹر عابد محمو د اور چیف سائنٹسٹ ایوب زرعی تحقیقاتی ادارہ فیصل آباد ڈاکٹر ساجد الرحمان نے بذریعہ ویڈیو لنک شرکت کی۔