کاشتکار ماہ فروری کے دوران چنے کی فصل پر کیمیائی سپرے کا استعمال کریں،ڈی ڈی زراعت سیالکوٹ

پیر 3 فروری 2025 18:44

سیالکوٹ (اُردو پوائنٹ اخبارتازہ ترین - اے پی پی۔ 03 فروری2025ء) محکمہ زراعت سیالکوٹ نے چنے اور مسورکی بہتر نگہداشت کیلئے سفارشات جا ری کر دی ہیں ۔ڈپٹی ڈائریکٹر محکمہ زراعت توسیع پسرور ڈاکٹر سجاد حیدر نے ’’ اے پی پی ‘‘ سے گفتگو کرتے ہوئے کہا ہے کہ کاشتکار ماہ فروری کے دوران چنے کی فصل پر پوڈ بورر کے حملہ کا خطرہ موجود ہوتا ہے۔ چنے کی فصل پر پوڈ بورر کے حملہ آور ہونے کی صورت میں کاشتکار فروری کے شروع میں ایک سپرے اور20 فروری کے بعد دوسرا سپرے محکمہ زراعت پنجاب کے مقامی زرعی ماہرین کے مشورہ سے زرعی زہروں کا مناسب اختیار کر کے کریں۔

انہوں نے بتایا کہ چنے اور مسور کی فصل میں جڑی بوٹیاں پیداوار میں کمی کا باعث بنتی ہیں، کاشتکار جڑی بوٹیوں کی تلفی کو یقینی بنائیں اور جڑی بوٹیوں کی تلفی بذریعہ گوڈی کریں۔

(جاری ہے)

اس کے علاوہ موجودہ موسمی تناظر میں چنے اور مسور کی فصل کی ہلکی آبپاشی کریں۔ آبپاش علاقوں میں بارش نہ ہونے کی صورت میں خصوصا پھول آنے پر اگر فصل سوکا محسوس کرے تو ہلکا سا پانی لگا دیں۔ کابلی چنے کے لیے پہلا پانی بوائی کے 2ماہ کے بعد اور دوسرا پھول آنے پر دیں۔ انہوں نے مزید کہا اگیتی کاشتہ چنے کی فصل کا کثرت کھاد یا بارش وغیرہ کی وجہ سے فصل کا قد بڑھنے لگے تو مناسب حد تک پانی کا سوکا دیں یا کاشت کے دوماہ بعد شاخ تراشی کریں۔