محکمہ زراعت کا کاشتکاروں کو سویابین کی منظور شدہ اقسام کی کاشت فروری کے آخر تک مکمل کرنے کا مشورہ

جمعرات 6 فروری 2025 13:56

فیصل آباد (اُردو پوائنٹ اخبارتازہ ترین - اے پی پی۔ 06 فروری2025ء) محکمہ زراعت نے کاشتکاروں کومشورہ دیا ہے کہ وہ سویابین کی منظور شدہ اقسام کی کاشت رواں ماہ فروری کے آخر تک مکمل کر لیں اور اچھی پیداوار کے حصول کیلئے بہتر روئیدگی والا منظور شدہ اقسام کا40 سے45 کلوگرام بیج فی ایکڑ استعمال کریں نیزمنظور شدہ موزوں اقسام این اے آر سی 1، این اے آر سی2، ایف ایس95، ولیمز82 اور فیصل سویا بین کی کاشت کو ترجیح دی جائے۔

اسسٹنٹ ڈائریکٹر محکمہ زراعت توسیع فیصل آبادڈاکٹرعامرصدیق نے کہاکہ سویا بین ایک منافع بخش فصل ہے جس کے بیج میں 38 سے42 فیصد پروٹین اور18 سے21 فیصد اعلیٰ قسم کا تیل پایا جاتاہے۔انہوں نے کہاکہ سویابین کی فصل نہ صرف اعلیٰ کوالٹی کے تیل کے حصول کا ذریعہ ہے بلکہ اس کی کاشت سے زمین کی زرخیزی میں بھی اضافہ ہوتا ہے۔

(جاری ہے)

انہوں نے کہاکہ یہ تیل دل کے مریضوں کیلئے جبکہ اس کا آٹا ذیابیطس کے مریضوں کیلئے بہت مفید ہے۔

انہوں نے بتایاکہ سویا بین سے تقریباََ200 سے زائد مختلف قسم کی خوردنی اشیاتیار کی جاتی ہیں جن میں خوردنی تیل، گھی، خشک دودھ، سویا مکھن اور بیکری کی اشیاوغیرہ شامل ہیں۔انہوں نے مزید بتایا کہ سویا بین پھلی دار اجناس مثلاََ مونگ، ماش، لوبیا، برسیم، گوارہ کے خاندان سے تعلق رکھتی ہیں یہی وجہ ہے کہ سویا بین کی جڑوں پر لگے منکوں پر نائٹروجن جمع کرنے والے جرثومے ہوتے ہیں جو تقریباً60 کلو گرام فی ہیکٹر نائٹروجن جمع کرتے ہیں جس سے زمین کی زرخیزی میں خاطر خواہ اضافہ ہوتا ہے اور آئندہ کاشت ہونے والی فصل کو بھی اس زرخیزی کا فائدہ پہنچتا ہے اسلئے سویا بین کو باغات کے درمیان بھی کاشت کیا جا سکتا ہے تاکہ باغات کو سویابین سے حاصل ہونے والی زرخیزی سے فائدہ ہو سکے۔

Facebook Twitter Google + Share on Whatsapp

محکمہ زراعت کا کاشتکاروں کو سویابین کی منظور شدہ اقسام کی کاشت فروری کے آخر تک مکمل کرنے کا مشورہ

متعلقہ عنوان :

مزید زراعت کی خبریں