سیب میں کلفٹ گرافٹنگ اور ٹی بڈنگ کے ذریعے صحیح النسل پودے کامیابی سے تیار کئے جا سکتے ہیں،ماہرین اثمار

جمعرات 13 فروری 2025 15:16

فیصل آباد (اُردو پوائنٹ اخبارتازہ ترین - اے پی پی۔ 13 فروری2025ء) سیب کی جدید پیداواری ٹیکنالوجی سے استفادہ اور پیوند کاری کا عمل چھوٹے روٹ سٹاک کے ذریعے فروری و مارچ میں مکمل کیا جاسکتا ہے جبکہ سیب کی افزائش نسل بذریعہ پیوندکاری کی جاتی ہے او ر عمومی طور پر چھوٹے سیب کے زیر بچے دسمبر میں اکھاڑ کر نرسری میں لگا دیئے جاتے ہیں جو فروری و مارچ میں پیوندکاری کے قابل ہو جاتے ہیں نیز چھوٹے سیب کاروٹ سٹاک بذریعہ بیج بھی تیار کیاجاتاہے اور سیب میں کلفٹ گرافٹنگ اور ٹی بڈنگ کے ذریعے صحیح النسل پودے کامیابی سے تیار کئے جا سکتے ہیں اور کلفٹ گرافٹنگ فروری میں جبکہ ٹی بڈنگ مون سو ن کی بارشوں کے بعد کرنے کے مثبت نتائج حاصل کئے جاسکتے ہیں۔

جامعہ زرعیہ فیصل ۱ٓباد کے ماہرین اثمارنے باغبانوں سے کہا کہ موسم بہارکورے سے پاک ہونے اور فروری و مارچ میں خوابیدگی توڑنے سمیت پھول لانے کیلئے سیب کے پودے کو 7ڈگری سینٹی گریڈ سے کم درجہ حرارت کے ایک ہزار سے1500گھنٹے پرمحیط چلنگ آورز درکار ہوتے ہیں۔

(جاری ہے)

انہوں نے بتایاکہ سیب کے پودے کو مجموعی طورپر سالانہ 100سے150سینٹی میٹر بارش کی ضرورت ہوتی ہے۔

انہوں نے کہاکہ اگرچہ سیب میرازمین سے لیکر چکنی اقسام کی زمینوں میں کاشت کیا جاسکتاہے مگر بہتر پیداوار کیلئے ذرخیز میرا زمین کاانتخاب کرناچاہیے جس میں پانی جذب کرنے کی بھرپور صلاحیت، ہوا کا بہترین نکاس اور نامیاتی مادے وافرمقدار میں موجود ہونے کے علاوہ زمین کی پی ایچ کی حد 5.5 سے 6.5 تک ہو اورزمین سخت جبکہ زیر زمین تہہ سیم کے مسائل سے پاک ہو۔انہوں نے کہاکہ باغبان مزید رہنمائی کیلئے ماہرین زراعت کی خدمات سے استفادہ کرسکتے ہیں۔