راج ببرخاندان میں اختلافات بڑھ گئے، بیٹے کی شادی نے نیا تنازع کھڑا کردیا

ہفتہ 15 فروری 2025 12:51

ممبئی (اُردو پوائنٹ اخبارتازہ ترین - این این آئی۔ 15 فروری2025ء)راج ببر کے بڑے صاحبزادے 43 سالہ آریا ببر نے دعوی کیا ہے کہ 38 سالہ پراتیک ببر نے اپنی شادی میں والد راج ببر کو بلایا تک نہیں۔بھارتی میڈیا رپورٹ کے مطابق پراتیک ببر نے جمعے کو 34 سالہ اداکارہ پریا بینرجی سے شادی کی ہے، جس پر ان کے بڑے بھائی آریا ببر نے ردعمل دیا۔پراتیک ببر کی شادی نے نیا تنازع کھڑا کردیا، انہوں نے پریا بینرجی سے شادی کی لیکن اس میں اپنے والد کو مدعو تک نہیں کیا، جس پر آریا ببر نے مایوسی اور الجھن کے ملے جلے رویے کا اظہار کیا۔

(جاری ہے)

آریا ببر نے ساتھ ہی اپنے بھائی کو براہ راست مورد الزام نہیں ٹھہرایا بلکہ اتنا کہا کہ کسی نے اس کے دماغ پر قبضہ کرلیا ہے، کوئی پراتیک کے فیصلوں پر اثر انداز ہورہا ہے، یہی وجہ ہے کہ وہ ببر خاندان سے دور ہورہا ہے۔انہوں نے مزید کہا کہ وہ خاندان کے کسی بھی فرد سے رابطہ نہیں کرنا چاہتا بلکہ اس نے شادی میں کسی کو بھی بلانے سے انکار کردیا، چلیں وہ اگر خاندان کے دیگر لوگوں کو نہیں بلانا چاہتا تو کوئی لیکن اسے والد کو تو ضرور بلانا چاہیے تھا۔یاد رہے کہ یہ پراتیک کی دوسری شادی ہے، ان کی پہلی اہلیہ سانیہ ساگر تھیں، جوڑے میں ایک سال بعد ہی علیحدگی ہوگئی اور انہوں نے 2023 میں طلاق لے لی تھی۔