ٹک ٹاک پر دھمکیاں دینے کا الزام، رجب بٹ سمیت7دیگرافراد کیخلاف مقدمہ درج

سوشل میڈیا آرٹسٹ عمر فیاض کی مدعیت میں مقدمہ درج کیا گیا ہے قانون کے مطابق کارروائی عمل میں لائی جائیگی ، پولیس

فیصل علوی بدھ 26 فروری 2025 15:45

ٹک ٹاک پر دھمکیاں دینے کا الزام، رجب بٹ سمیت7دیگرافراد کیخلاف مقدمہ ..

لاہور(اردوپوائنٹ اخبار تازہ ترین۔26فروری 2025)ٹک ٹاک پر دھمکیاں دینے اور کلاشنکوف لے کر گھر کی دہلیز پر آنے کے الزام پر یوٹیوبر رجب بٹ سمیت دیگر 7 افراد کے خلاف مقدمہ درج کرلیا گیا، پولیس کا کہنا ہے کہ سوشل میڈیا آرٹسٹ عمر فیاض کی مدعیت میں مقدمہ درج کیا گیا ہے ،ایف آئی آر کے مطابق مدعی کا کہنا ہے کہ صبح کے وقت رجب بٹ، مان ڈوگر، حیدر شاہ اور مسلح افراد ان کے گھر تک پہنچ گئے اور انہوں نے مجھے دھمکیاں دیں کہ ٹک ٹاک پر آنے کا مزہ چکھا دیں گے۔

اس موقع پرمان ڈوگر نے ٹک ٹاک لائیو کے دوران ان کے ساتھ گالی گلوچ اور دھمکیاں دیں۔مدعی کے مطابق ملزمان نے میری عزت مجروح کی ہے جس سے جان کو خطرہ ہے۔پولیس کا کہنا ہے کہ مدعی کی درخواست پرمقدمہ درج کرلیا گیا ہے اور قانون کے مطابق کارروائی عمل میں لائی جائیگی۔

(جاری ہے)

واضح رہے کہ گزشتہ ماہ جوڈیشل مجسٹریٹ لاہور نے شیر کا بچہ رکھنے کے الزام میں ٹک ٹاکر رجب بٹ کو سزا سنا ئی تھی ۔

عدالت نے ٹک ٹاکر کو کمیونٹی سروس کی سزا سنائی گئی تھی۔رجب بٹ نے غیرقانونی طور پر شیر کا بچہ اپنے پاس رکھنے کا اعتراف کیا تھا۔جوڈیشل مجسٹریٹ کے فیصلے میں کہا تھا کہ ٹک ٹاکر رجب بٹ ایک سال تک پرو بیشن افسر کے ماتحت کمیونٹی سروس فراہم کریں گے۔عدالت نے محکمہ وائلڈ لائف کو جانوروں کے تحفظ بارے تمام مواد رجب بٹ کو فراہم کرنے کی ہدایت کی تھی۔

ٹک ٹاکررجب بٹ اپنے 5 منٹ کے وی لاگ میں جانوروں کے حقوق پر گفتگو کریں گے۔ وی لاگ ہر ماہ کے پہلے ہفتے میں پرو بیشن افسر کی اجازت کے بعد اپ لوڈ ہوگا۔ وی لوگ میں جانوروں کے تحفظ اور حقوق سے متعلق گفتگو کی جائیگی۔عدالتی فیصلے میں مزید کہا گیا تھا کہ اگر پروبیشن آفیسر رجب بٹ کو ذاتی حیثیت میں طلب کرے تو وہ حاضری کے پابند ہوں گے۔ فیصلے پر عملدرآمد نہ ہونے کی صورت میں رپورٹ عدالت میں پیش کی جائے گی۔

ٹک ٹاکر رجب بٹ نے بیان میں اعتراف کرتے ہوئے کہا تھاکہ میرے پاس سے غیر قانونی طور پر شیر کا بچہ برآمد ہواتھا۔ غلطی کا ادراک کرتے ہوئے رضاکارانہ طور پر اپنے سوشل میڈیا پلیٹ فارم سے کمیونٹی سروس فراہم کروں گا اور جنگلی جانوروں کے حقوق سے متعلق مثبت پیغام دوں گا۔رجب بٹ کا اپنے بیان میں مزید کہنا تھا کہ میرے علم میں نہیں تھا کہ جنگلی جانور تحفے کے طور پر وصول نہیں کئے جا سکتے تھے۔ اب سمجھ گیا تھا کہ ان حالات میں جنگلی جانوروں کو رکھنا نا مناسب تھا۔