زرعی یونیورسٹی پشاور شعبہ ہارٹیکلچر شجرکاری مہم

جمعرات 27 فروری 2025 15:20

پشاور (اُردو پوائنٹ اخبارتازہ ترین - اے پی پی۔ 27 فروری2025ء) شعبہ ہارٹیکلچر ، زرعی یونیورسٹی پشاور نے ہائرایجوکیشن گرین یوتھ موومنٹ کے تعاون سے شجرکاری مہم پروگرام کا انعقاد کیا۔رجسٹرار زرعی یونیورسٹی پشاور ڈاکٹر رضوان احمد نے یونیورسٹی میں پائنس روکس برجائی کا پودا لگا کر باقاعدہ شجرکاری مہم کا آغاز کر دیا۔شجرکاری کی اس مہم میں ڈاکٹر رضوان احمد نے بتایا کہ پودے ملک کی معاشی، معاشرتی اور ماحولیاتی خوشحالی میں بہتری لائے گی ، آج کل دنیا خاص طور پر پاکستان موسمیاتی تغیرات، آلودگی ، خشک سالی، طغیانی اور سیلابوں کے مسائل سے دوچار ہے، جس سے نمٹنے کیلئے ہمیں زیادہ پودے لگانے کی ضرورت ہے ۔

ہماری زمین شجرکاری کے لئے نہایت موزوں ہے، درخت لگانا صدقہ ہے، ہم جو پودے لگائیں ان کی اچھی دیکھ بھال بھی کریں۔

(جاری ہے)

عوام، کسان اور طلباء بھی شجرکاری مہم میں بڑھ چڑھ کر حصہ لیں۔ انہوں نے مزید کہا کہ یونیورسٹی طلبہ و طالبات کو نصابی سرگرمیوں کے ساتھ ساتھ ہم نصابی سرگرمیوں میں حصہ لینے کے لئے بہترین مواقع فراہم کر رہی ہے۔ انہوں نے شعبہ ہارٹیکلچر کے چیئر مین پروفیسر ڈاکٹر گوہر ایوب، ڈائریکٹر سٹوڈنٹس کونسلنگ ، پلیسمینٹ اینڈ ہیومن ریسورس ڈیویلپمنٹ ڈاکٹر انور علی شاد، ڈاکٹر فضل واحد سمیت فیکلٹی ممبران، انتظامی افسران اور طلبہ و طالبات کی کاوشوں کو سراہا۔

چیئرمین پروفیسر ڈاکٹر گوہر ایوب نے مہمان خصوصی ڈاکٹر رضوان احمد اور دیگر شرکاکا شکریہ ادا کیا۔پروفیسر ڈاکٹر محمد ساجد، ڈاکٹر مسعود احمد اور ڈاکٹر فضل واحد نے شرکاکو پودوں سے متعلق بریفنگ دی۔اس موقع پر فیکلٹی ممبران، انتظامی آفسران اور طلبہ وطالبات نے بھی پودے لگائے۔

Facebook Twitter Google + Share on Whatsapp

زرعی یونیورسٹی پشاور شعبہ ہارٹیکلچر شجرکاری مہم

متعلقہ عنوان :

مزید قومی خبریں