کاشتکاروں کو زمینوں میں کبیرہ و صغیرہ عناصر سمیت زنک و بوران کی کمی دور کرنے کےلئے محکمہ زراعت کے مشوروں پر عمل درآمد کی ہدایت

فیصل آباد (اُردو پوائنٹ اخبارتازہ ترین - اے پی پی۔ 28 فروری2025ء) پنجاب کے مختلف اضلاع کی اکثرزمینوں میں کبیرہ و صغیرہ عناصر سمیت زنک و بوران کی تیزی سے کمی ہونے لگی ہے جس کے خاتمہ اور زرعی اجناس کی بہترپیداوار کے حصول کے لئے کاشتکاروں کو محکمہ زراعت کے مشوروں پر عملدرآمد کی ہدایت کی گئی ہے۔ڈپٹی ڈائریکٹر محکمہ زراعت توسیع فیصل آبادعدیل احمدنے بتایاکہ یہ بات اپنی جگہ پر مسلمہ ہے کہ زمین کی ذرخیزی بڑھانے کےلئے سبز کھادوں اور گوبر کی کھاد کا استعمال کرنا چاہیے نیز سبز کھادیں تو فصلوں کے ہیر پھیر سے زینت کھیت بن سکتی ہیں اس لئے اگرسبز کھاد ممکن ہو تو بہت ہی بہترہے تاہم اگر سبز کھاد میسر نہ ہو تو 10سے 15ٹن گوبر کی گلی سڑی کھاد (روڑی) فصل کاشت کرنے سے ایک ماہ قبل کھیت میں ڈال کر ہل چلانا چاہیے۔

(جاری ہے)

انہوں نے کہاکہ گوبر کی تازہ کھاد زمین میں ڈالنے سے ایک طرف تو غذائی عناصر کی فراہمی فصل کو مناسب نہیں ہوتی دوسری طرف یہ فصل پر دیمک کا سبب بھی بنتی ہے۔انہوں نے کہاکہ سورج مکھی کی فصل سے بہتر پیداوار حاصل کرنے کےلئے پودوں کی غذائی ضروریات کا درست پتہ ہونا بہت ضروری ہے اس لئے اس مقصد کی غرض سے ہمیں اپنی زمینوں کی مٹی کا تجزیہ کروانا چاہیے۔

انہوں نے کہا کہ سورج مکھی کے100کلو گرام بیجوں میں 6 کلو گرام نائٹروجن، 2 کلوگرام فاسفورس اور 18 کلوگرام پوٹاش پائی جاتی ہے اس طرح یہ غذائی اجزا پودے نے زمین ہی سے حاصل کئے ہوتے ہیں جوکہ ہمیں اس کے بیجوں میں ملتے ہیں۔ انہوں نے کہاکہ جو فاسفورس پودے نے زمین سے جذب کی ہوتی ہے اس کا تین چوتھائی بیجوں میں پایا جاتا ہے اس لئے نائٹروجن، فاسفورس اور پوٹاش اگر مقرر کردہ تناسب میں ڈالی جائے تو بیج کی پیداوار اور تیل دونوں زیادہ حاصل ہوتے ہیں۔

انہوں نے کہاکہ نائٹروجن کی کمی سے سورج مکھی کے پھول کی جسامت چھوٹی رہتی ہے اور پھول کے مرکز میں بننے والے بیج بھی گری کے بغیر ہوتے ہیں جس سے پیداوار پر منفی اثرپڑتا ہے۔انہوں نے بتایاکہ فاسفورس کی کمی سے بیجوں کا سائز اور ان میں بننے والا تیل دونوں میں کمی ہو جاتی ہے۔ انہوں نے کاشتکاروں کو ہدایت کی کہ وہ ماہرین زراعت کے مشوروں پر عمل کریں تاکہ جدید پیداواری ٹیکنالوجی کے باعث انہیں کم خرچ میں اچھی پیداوار حاصل ہوسکے۔