بھارت نے جموںوکشمیر میں خوف ودہشت کے بل پر امن قائم کر رکھا ہے، عمر عبداللہ

ہفتہ 1 مارچ 2025 18:09

دلی (اُردو پوائنٹ اخبارتازہ ترین - اے پی پی۔ 01 مارچ2025ء) بھارت کے غیر قانونی زیر قبضہ جموںوکشمیر کے وزیر اعلیٰ عمر عبداللہ نے کہا ہے کہ دفعہ 370کی منسوخی کو پانچ برس سے زائد کا عرصہ گزر چکا لیکن جموں و کشمیر میں حقیقی معنوں میں امن و اماں کی صورتحال میں کوئی بہتری نہیں آئی ہے۔کشمیرمیڈیاسروس کے مطابق عمر عبداللہ نے نئی دلی میں ایک مباحثے کے دوران کہا کہ بی جے پی کی بھارتی حکومت دعویٰ کر رہی ہے کہ مقبوضہ جموںوکشمیر میں حالات معمول پر آگئے ہیں لیکن حقیقت یہ ہے کہ صورتحال میں جو بہتری نظر آرہی ہے وہ حقیقی نہیں بلکہ خوف و دہشت کے بل پر قائم کی گئی بہتری ہے۔

ایک سوال کے جواب میں انہوں نے کہا کہ اگر خوف و ڈر کا ماحول ختم کیا جائے تو پھر آپ(بھارت) کیلئے دوبارہ مسائل کھڑے ہو جائیں گے۔

(جاری ہے)

عمر عبداللہ نے مزید کہا کہ آپ خوف و دہشت سے صرف ایک محدود وقت کے لیے صورت حال کو کنٹرول کر سکتے ہیں، اگر دلی حکومت کو اس بات کا مکمل یقین ہوتا کہ حالات کی بہتری کی ایک ٹھوس بنیاد ہے تو وہ سری نگر کی جامع مسجد کو بند نہ کرتی اور میر واعظ کو یہاں اپنے سسر کی نماز جنازہ ادا کرنے سے نہ روکتی۔انہوں نے کہا کہ جامع مسجد میں نماز جنازہ ادا نہ کرنے دینے کی وجہ یہ ہے کہ دلی کو خوف تھا کہ اس سے امن و امان کی صورتحال خراب ہو جائے گی لہذا جموں و کشمیر میں اس وقت صورتحال میں جو بہتری نظر آرہی ہے وہ جبرکے بل پر قائم کردہ بہتری ہے۔