عبدالعلیم خان سے آسٹریلوی ہائی کمشنر کی ملاقات

اسلام آباد(اُردو پوائنٹ اخبارتازہ ترین - این این آئی۔ 06 مارچ2025ء)وفاقی وزیر مواصلات عبدالعلیم خان نے کہا ہے کہ آسٹریلیا اور پاکستان کے دو طرفہ تعلقات ہمیشہ ہی خوشگوار اور گرم جوشی پر مبنی رہے ہیں، دونوں ملک طلبا کیلئے تعلیمی وظائف، خوراک و آبی تحفظ جیسے امور پر تعاون کررہے ہیں، صحت کے شعبہ بالخصوص پولیو، ایڈز، ملیریا کے خلاف لڑائی میں آسٹریلیا کی مدد کو پاکستان قدر کی نگاہ سے دیکھتا ہے۔

یہ بات انہوں نے پاکستان میں آسٹریلیا کے ہائی کمشنر نیل ہاکنز سے ملاقات کے دوران کہی جنہوں نے وفاقی وزیر سے ملاقات کی ۔ وفاقی وزیر اور آسٹریلوی ہائی کمشنر کے درمیان باہمی دلچسپی اور دو طرفہ تعاون کے فروغ سے متعلق مختلف امور پر گفتگو ہوئی۔ اس موقع پر وفاقی وزیر نے کہا کہ آسٹریلیا اور پاکستان کے دو طرفہ تعلقات ہمیشہ ہی خوشگوار اور گرم جوشی پر مبنی رہے ہیں،پاکستان اور آسٹریلیا طلبا کیلئے وظائف ، خوراک و آبی تحفظ جیسے امور پر تعاون کر رہے ہیں۔

(جاری ہے)

انہوں نے کہا کہ پولیو،ایڈز،ملیریا کے خلاف لڑائی میں آسٹریلیا کی مدد کو پاکستان قدر کی نگاہ سے دیکھتا ہے۔ عبدالعلیم خان نے کہا کہ دونوں ملکوں کے درمیان معاشی تعاون کو مزید فروغ دینے کی ضرورت ہے۔وفاقی وزیر نے کہاکہ موسمیاتی تبدیلی اور معاشی ترقی کیلئے باہم مل کر کام کرنے سے تعلقات مزید مضبوط ہوں گے۔ عبدالعلیم خان نے کہا کہ پاکستان اس وقت چاول، لوہے کی مصنوعات، مصالحہ جات اور ٹیکسٹائل مصنوعات آسٹریلیا کو برآمد کر رہا ہے، پاکستان آسٹریلیا کو موجودہ برآمدات کی مقدار بڑھانا اور نئی درآمدات شامل کرنا چاہتا ہے۔

وزیر مواصلات نے کہا کہ زرعی مصنوعات اور قدرتی دھاتوں کی پاکستان سے آسٹریلیا برآمد کے وسیع امکانات اور دونوں ممالک کے درمیان کھیل کے میدان کے ذریعے باہمی تعلقات کے فروغ کے مواقع موجود ہیں۔ انہوں نے کہا کہ غیر ملکی سرمایہ کاروں کیلئے پاکستان میں اس وقت ماحول انتہائی سازگار ہے۔ وفاقی وزیر عبدالعلیم خان نے کہا کہ غیر ملکی سرمایہ کاروں کی حوصلہ افزائی اور سہولت کاری کیلئے متعلقہ اداروں میں ضروری اصلاحات کی گئی ہیں۔اس موقع پر گفتگو کرتے ہوئے آسٹریلوی ہائی کمشنر نے کہا کہ معاشی تعلقات اور سرمایہ کاری کیلئے پاکستان کی موجودہ حکومت کے اقدامات حوصلہ افزا ہیں،ہم پاکستان کے ساتھ باہمی شراکت داری کے تمام امکانات پر کام کرنے کیلئے پر عزم ہیں۔