سعودی عرب، زائرین کو مسجد الحرام کے باہر سمارٹ امانت گھرکی سہولت فراہم

سمارٹ امانت گھر کی سہولت زائرین کو رمضان المبارک میں 24 گھنٹے دستیاب ہوگی

جمعہ 7 مارچ 2025 17:41

سعودی عرب، زائرین کو مسجد الحرام کے باہر سمارٹ امانت گھرکی سہولت فراہم

ریاض(اُردو پوائنٹ اخبارتازہ ترین - این این آئی۔ 07 مارچ2025ء)سعودی عرب کے ادارہ برائے امور الحرمین الشریفین نے مسجد الحرام کے بیرونی صحنوں میں زائرین کے سامان کو عارضی طور پر رکھنے کے لیے سمارٹ لاکرز(سمارٹ امانت گھر)کی سہولت فراہم کر دی ہے۔عرب ٹی وی کے مطابق سامان رکھنے کے لیے لاکرز کی فراہمی کا مقصد دوسرے شہروں سے آنے والے زائرین کو سہولت فراہم کرنا ہے تاکہ وہ اپنے سامان کو بحفاظت یہاں رکھ کر اطمینان سے عمرہ یا طواف کر سکیں۔

مسجد الحرام میں کسی قسم کا سامان لے جانے کی ممانعت ہے جس کی وجہ سے دوسرے شہروں سے آنے والے زائرین کو بعض اوقات کافی دشواری ہوتی تھی ،امانت گھر کی وجہ سے زائرین اپنا سامان بحفاظت یہاں جمع کرانے کے بعد اطمینان سے مسجد الحرام میں داخل ہو سکتے ہیں۔

(جاری ہے)

لاکرز یا سمارٹ امانت گھر کی سہولت زائرین کو رمضان المبارک میں 24 گھنٹے دستیاب ہوگی۔مسجد الحرام کے مشرقی جانب کے صحن گیٹ نمبر64 اور مغربی سمت کے صحن کے علاوہ مزید 6 مقامات پر امانت گھر کی سہولت فراہم کی گئی ہے۔

امانت گھر میں سامان جمع کرانے کے لیے جدید ترین ٹیکنالوجی استعمال کی گئی ہے جس کے تحت زائر کو دی جانے والی رسید پر پرنٹ ہونے والے کیو آر کوڈ کے ذریعے سامان کی جملہ تفصیلات سسٹم میں منتقل ہو جاتی ہیں جس میں سامان کے مقام کا بھی تعین کیا جاتا ہے ۔سامان کی وصولی کے لیے اہلکار کو وہ ٹوکن دینا ہوتا ہے جو سامان جمع کرانے کے بعد جاری کیا جاتا ہے۔