آغا خان یونیورسٹی کو ایم آر سی پی (UK) پیسز امتحان کے لیے باضابطہ مرکز کی منظوری مل گئی

کراچی (اُردو پوائنٹ اخبارتازہ ترین - این این آئی۔ 13 مارچ2025ء)آغا خان یونیورسٹی نے ایک اوراہم سنگ میل عبور کر لیا ہے، کیونکہ اسے ایم آر سی پی (UK) پارٹ 2 کلینیکل امتحان (PACES) کے لیے باضابطہ امتحانی مرکز کے طور پر تسلیم کر لیا گیا ہے۔ یہ قابلِ قدر منظوری برطانیہ کے رائل کالجز آف فزیشنز (RCI) کی جانب سے دی گئی ہے جو خطے میں طبی تعلیم اور جانچ کے میدان میں آغا خان یونیورسٹی کے قائدانہ کردار کو مزید مستحکم کرتی ہے۔

اس منظوری کو حاصل کرنے کے لیے آغا خان یونیورسٹی کے سینٹر فار انوویشن ان میڈیکل ایجوکیشن (CIME) نے ایک پاتھ فائنڈر ماک پیسز امتحان کامیابی کے ساتھ منعقد کیاجس میں اس کی اعلی معیار کی سیمولیشن سہولیات، ماہر ممتحنین اور امتحانی انتظامات کا جائزہ لیا گیا۔

(جاری ہے)

یہ جائزہ آغا خان یونیورسٹی کے میڈیکل کالج کے اشتراک سے منعقد کیا گیاتاکہ یونیورسٹی بین الاقوامی معیار پر پورا اترنے کو یقینی بنا سکے۔

ڈاکٹر فیصل اسماعیل، ریجنل ڈائریکٹر، CIME، ساتھ ایشیانے کہا "یہ آغا خان یونیورسٹی اور پاکستان کے سینکڑوں نوجوان میڈیکل ٹرینیز کے لیے شاندار خبر ہے۔ سینٹر فار انوویشن ان میڈیکل ایجوکیشن میں ایم آر سی پی (UK) پیسز امتحان کا انعقاد اس بات کی تصدیق کرتا ہے کہ ہم عالمی معیار کے اعلی سطحی امتحانات منعقد کر سکتے ہیں اور اس سے مقامی امیدواروں کو بین الاقوامی سطح پر تسلیم شدہ قابلیت اپنے ملک میں حاصل کرنے کا موقع ملے گا۔

" اس اقدام کے تحت، آغا خان یونیورسٹی کے میڈیکل کالج کے 14 فیکلٹی ممبران کو بھی آر سی پی کی جانب سے باضابطہ ایم آر سی پی (UK) پیسز ممتحن کے طور پر تصدیق دی گئی ہے، جو آغا خان یونیورسٹی کے فیکلٹی کے اعلی معیار کی عکاسی کرتا ہے اور یونیورسٹی کی طبی امتحانات کے انعقاد کی صلاحیت کو مزید مستحکم کرتا ہے۔ آغا خان یونیورسٹی - CIME میں پہلا باضابطہ پیسز امتحان اگست 2025میں منعقد ہوگا جس سے پاکستانی اور خطے کے دیگر امیدواروں کو یہ اہم امتحان ایک کم لاگت اور باآسانی دستیاب آپشن کے ذریعے بیرونِ ملک سفر کیے بغیر دینے کا موقع ملے گا۔

ڈاکٹر محمد طارق، پروفیسر اور وائس ڈین، میڈیکل کالج، آغا خان یونیورسٹی نے کہا"یہ کامیابی طبی تعلیم میں آغا خان یونیورسٹی کے غیر متزلزل عزم کا ثبوت ہے۔ پیسز امتحان کے لیے باضابطہ مرکز کی منظوری اور ہمارے بین الاقوامی سطح پر تصدیق شدہ ممتحنین کی ٹیم ہمیں پاکستان میں طبی امتحانات کے شعبے میں صفِ اول پر لے آتی ہے۔ ہم بین الاقوامی اشتراکات کے ذریعے اپنے اثر و رسوخ کو مزید وسعت دینے کے منتظر ہیں۔" اس اہم سنگ میل کے ساتھ، آغا خان یونیورسٹی خطے میں طبی تعلیم اور جانچ کے میدان میں نئے معیارات قائم کرتے ہوئے، ایک ممتاز مرکز کے طور پر اپنی حیثیت کو مزید مستحکم کر رہا ہے۔