تمام مکاتب اور مسالک کے مقدسات کا احترام لازم اور توہین ممنوع ہے ،علامہ سید ساجد علی نقوی

ہم نے ایک تاریخی اعلامیہ وحدت پر دستخط کرکے امت مسلمہ کو ایک لڑی میں پرونے میں کوششوں کی بنیاد رکھی ،قائدملت جعفریہ

جمعرات 13 مارچ 2025 21:30

کراچی(اُردو پوائنٹ اخبارتازہ ترین - این این آئی۔ 13 مارچ2025ء)قائد ملت جعفریہ پاکستان علامہ سید ساجد علی نقوی نے کہاہے کہ انصار و مہاجرین والا جذبہ بیدار کرتے ہوئے ایک دوسرے کے دکھ سکھ بانٹے جائیں تاکہ مشکلات اور مصائب کا مقابلہ کیا جاسکے اتحاد و وحدت اور امت مسلمہ کی یکجہتی کو قرآنی و نبوی فریضہ گردانتے ہوئے ہم نے ایک تاریخی اعلامیہ وحدت پر دستخط کرکے امت مسلمہ کو ایک لڑی میں پرونے میں کوششوں کی بنیاد رکھی پھر نفاذ شریعت سفارشات اتحاد بین المسلمین کمیٹیاں ضابطہ ہائے اخلاق اور ان سے بھی بڑھ کر پہلے ملی یکجہتی کونسل پاکستان کی بنیاد رکھی جس میں ملک کے تمام اسلامی مکاتب و مسالک کی نمائندہ دینی جماعتوں کی بھرپور شرکت تھی اور اس کے بعدسن 2000ء کے اوائل میں متحدہ مجلس عمل پاکستان وجود میں آئی قائد ملت جعفریہ پاکستان نے واضح کیا کہ ہمارے درمیان بہت سے مشترکا ت ہیں جنہیں اجاگر کرنے کی ضررت ہے اور فروعی نوعیت کے اختلافات کا بیان مہذب انداز میں شائستگی کے ساتھ علمی سطح پر کرنے کی عادت ڈالنی چاہیے تمام مکاتب اور مسالک کے مقدسات کا احترام لازم اور توہین ممنوع ہے ہمارے اسی موقف کی تائید ہمارے بزرگان دین مراجع کرام اور آیات عظام نے کی ہے باہمی محبت و رواداری کو فروغ دے کر نفرتوں بغض و عناد اور عداوتوں کا خاتمہ کرکے وحدت کا عملی مظاہرہ کیانجائے۔