سرمایہ کاری کے فروغ کیلئے پالیسی ریٹ کو سنگل ڈیجٹ میں لانا نا گزیر ہے‘ ٹیکس ایڈوائزرز ایسوسی ایشن

ایف بی آر من مرضی کے آرڈر ،نوٹسز کے باوجود ٹیکس اہداف پورے کرنے میں ناکام کیوں ہے ‘ سینئر ممبر امانت بشیر

جمعہ 14 مارچ 2025 15:40

لاہور(اُردو پوائنٹ اخبارتازہ ترین - این این آئی۔ 14 مارچ2025ء)پاکستان ٹیکس ایڈوائزر زایسوسی ایشن کے سینئر ممبر چودھری امانت بشیر نے کہا ہے کہ سرمایہ کاری کے فروغ کے لئے پالیسی ریٹ کو سنگل ڈیجٹ میں لانا نا گزیر ہے ،بجلی ،گیس کی قیمتوں میں کمی کا خواب بھی ادھورا ہے ، ریونیو شارٹ فال میں کمی کی بجائے اضافہ ہوتا جا رہا ہے ،ایف بی آر کے افسران من مرضی کے آرڈر اور نوٹسز کرنے کے باوجود ٹیکس اہداف پورے کرنے میں ناکام کیوں ہیں ۔

(جاری ہے)

ملاقات کے لئے آنے والے وفد سے گفتگو کرتے ہوئے کہا کہ آئی ایم ایف کی شرائط کا بہانہ کر نت نئے ٹیکسز ،شرائط عائد کی جارہی ہیں، ایف بی آر کے اختیارات میں بے جا اختیارات سے حالات خراب ہو رہے ہیں ،ودہولڈنگ ٹیکسز کے ریٹس میں اضافہ کرکے موجودہ ٹیکس دہندگان کو نشانہ بنایا جا رہا ہے جبکہ یہ تمام حربے جب کامیاب ہوتے ہیں جب بزنس سرگرمیاں عروج پر ہوں ،کاروبار پھل پھول رہے ہیں۔حکومتی تمام کاوشیں اور اقدامات بے سود دکھائی دے رہے ہیں۔ ٹیکس دہندگان کا اعتماد بحال کیا جائے جس سے معیشت مضبوط ہوگی اور ٹیکس اہداف بھی پورے ہوں گے۔