اکتوبر احتجاج کیس‘ عمرا یوب کی حاضری معافی کی درخواست منظور

چاروں ملزمان کی درخواست ضمانت پر سماعت 19مارچ تک کے لئے ملتوی

ہفتہ 15 مارچ 2025 16:27

اکتوبر احتجاج کیس‘ عمرا یوب کی حاضری معافی کی درخواست منظور

راولپنڈی(اُردو پوائنٹ اخبارتازہ ترین - این این آئی۔ 15 مارچ2025ء) انسداد دہشتگردی عدالت نے 5 اکتوبر احتجاج کیس میں اپوزیشن لیڈر عمر ایوب کی حاضری معافی کی درخواست منظور کرلی۔راولپنڈی کی انسداد دہشتگردی عدالت میں عمر ایوب کیخلاف تھانہ صدر حسن ابدال میں درج مقدمات میں عبوری ضمانت کی درخواست پر سماعت ہوئی، اے ٹی سی کے جج امجد علی شاہ نے عمر ایوب کی درخواست پر سماعت کی۔

دوران سماعت اپوزیشن لیڈر عمر ایوب کے وکلاء کی جانب سے حاضری معافی کی درخواست جمع کرائی گئی جو عدالت نے منظور کرلی۔

(جاری ہے)

مقدمہ میں نامزد ملزمان مشال یوسفزئی،صنم جاوید اور احد خٹک کی ضمانتوں پر بھی سماعت ہوئی، صنم جاوید عدالت پیش ہو گئیں جبکہ مشال یوسفزئی اور احد خٹک پیش نہ ہوئے، عدالت نے دونوں ملزمان کی جانب سے حاضری سے ایک روزہ استثنیٰ کی درخواست بھی منظور کرلی۔عدالت نے وکلاء صفائی کو19مارچ کودرخواست ضمانت پر بحث کرنے کا آخری موقع دیتے ہوئے چاروں ملزمان کی درخواست ضمانت پر سماعت 19مارچ تک کے لئے ملتوی کر دی۔واضح رہے کہ ملزمان کے خلاف تھانہ صدر حسن ابدال میں دہشتگردی ایکٹ سمیت دیگر دفعات کے تحت 2مقدمات درج ہیں۔