شہر اقتدار میں آئے روز نومولود مردہ بچے کوڑے کے ڈھیروں سے برآمد ہونے لگے

معاشی تنگدستی یا پھر ٹچ موبائل کا شاخسانہ،مادر پدر آزادی نے نسل نو کو تباہیوں کے گھٹا ٹوپ اندھیرے کی نظر کرنا شروع کر دیا

پیر 17 مارچ 2025 15:27

مظفرآباد(اُردو پوائنٹ اخبارتازہ ترین - این این آئی۔ 17 مارچ2025ء) معاشی تنگدستی یا پھر ٹچ موبائل کا شاخسانہ،مادر پدر آزادی نے نسل نو کو تباہیوں کے گھٹا ٹوپ اندھیرے کی نظر کرنا شروع کر دیا۔شہر اقتدار میں آئے روز نومولود مردہ بچے کوڑے کے ڈھیروں سے برآمد ہونے لگے۔ ایمز ہسپتال امبور کے باہر کوڑے کے ڈھیر سے نومولود مردہ حالت میں برآمد،1122 نے مردہ نو مولود امبور ہسپتال انتظامیہ کے حوالے کر دیا۔

قبل ازیں علامہ اقبال برج کے ساتھ منسلک کوڑے کے ڈھیر سے بھی ایک نومولود مردہ حالت میں جب کہ اس سے پہلے متعدد مرتبہ سی ایم ایچ مظفرآباد کے سامنے سے بھی کئی ایک نومولود بچے کوڑے کے ڈھیروں سے برآمد ہو چکے ہیں۔ رمضان المبارک کے بابرکت مہینے میں یہ بچہ کوڑے کے ڈھیر پر کس نے پھینکا، شہر بھر میں چہہ میگوئیاں شروع ہو گئیں۔

(جاری ہے)

عوامی حلقوں کا کہنا ہے کہ ایک جانب حکومت آزاد کشمیر لاچار غریب لوگوں کا معاشی قتل عام کرنے میں مصروف ہے تو دوسری جانب ضلعی انتظامیہ بھی سب اچھا کی رپورٹ دے کر اپنی کرسی بچانے میں مگن ہیں۔

ذخیرہ اندوزوں گراں فروشوں نے من مانیاں مچا رکھی ہیں۔ ان کا کہنا ہے کہ رہتی کسر ٹچ موبائل نے پوری کر دی ہے۔ ساتھ ہی ساتھ مخلوط تعلیمی نظام نے تو معاشرے کا بیڑا غرق کر دیا ہے۔ لوگوں نے ارباب اختیار سے مطالبہ کیا ہے کہ ایسے تمام سرکاری و پرائیویٹ ہسپتال جن میں آئے روز اباشن کیے جاتے ہیں کا ریکارڈ جمع کرنے سمیت اور آئے روز کوڑا کرکٹ کے ڈھیروں سے ملنے والے بچوں کا ڈی این اے کروایا جائے اور پھر سائنٹیفک تحقیقات کو بروئے کار لاتے ہوئے ایسے مجرموں کو بے نقاب کر کے نشان عبرت بنایا جائے۔