جربرا کارنیشن، گل داؤدی اور گل لالہ کے بعد پھولوں میں چوتھے نمبر پر ہے جسے تراشیدہ پھول کے طور پر پسند کیاجاتاہے، ماہرین ہارٹیکلچر

پیر 17 مارچ 2025 16:17

فیصل آباد (اُردو پوائنٹ اخبارتازہ ترین - اے پی پی۔ 17 مارچ2025ء) جامعہ زرعیہ کے ماہرین ہارٹیکلچر، گلبانی و چمن آرائی نے پھولوں کے کاشتکاروں کوجربرا نامی گلابی،جامنی،سفید،سرخ، کریم،اورنج وپیلے دلکش رنگوں کے پھولوں کی کاشت رواں ماہ مارچ کے دوران مکمل کرنے کی ہدایت کی اور کہاہے کہ جربرا کی 40اقسام کاشت کی جاتی ہیں جبکہ بطور تراشیدہ پھول جربرا کارنیشن، گل داؤدی اور گل لالہ کے بعد پھولوں میں چوتھے نمبر پر ہے جسے پاکستان سمیت دنیا بھر میں خوبصورت تراشیدہ پھول کے طور پر پسند کیاجاتاہے۔

انہوں نے بتایاکہ جربرا کے پودے کی اونچائی 18سے 24 سینٹی میٹر اور پھول کاسائز 4سے 10سینٹی میٹر ہوتاہے۔ انہوں نے کہاکہ کاشتکار رواں ماہ کے دوران ہائبرڈ ٹی روز کی مختلف اقسام کی کاشت بھی مکمل کرسکتے ہیں۔

(جاری ہے)

انہوں نے کہاکہ بھربھری، ذرخیز، اچھے نکاس اور 6 سے 6.5 تک تعامل کی حامل زمین شاندار فصل کی ضامن ہوتی ہے۔انہوں نے مزید کہا کہ ہائبرڈ گلاب کی مختلف اقسام مختلف انواع کی آب وہوا اور ہر قسم کی زمینوں میں کاشت کی جاسکتی ہیں۔

انہوں نے کہاکہ کوئین آف فلاور کو جہاں بطور کٹ فلاور انتہائی اہمیت حاصل ہے وہیں یہ اپنی خوشبو اور خوبصورتی کے باعث بھی انتہائی پسند کئے جاتے ہیں۔ انہوں نے پھولوں کے کاشتکاروں کولیڈیز فرسٹ،کارڈینل، کوئین الزبتھ، پیراڈائیز، اینجلیق، فرسٹ ریڈ، گولڈ میڈل، گولڈن ٹائم، ایمرلڈگرین، فریگرنٹ کلاوڈ، آئس برگ، کلیڈیئر، روزی چیک، فارمولا ون، تبت، کلاسک، بلیک بکارا، لوگیم، منڈیل، اینجلیق نیو ریڈ وغیرہ کی کاشت بھی مارچ کے آخر تک مکمل کرنے کا مشورہ دیا اور کہا کہ بروقت کاشت سے وہ اچھی پیداوار حاصل کر سکتے ہیں۔

انہوں نے کہاکہ گلاب اور ہائبرڈ ٹی روز کی دیگر اقسام کی کاشت کیلئے زمین کی تیاری موسم گرما میں کی جاتی ہے تاکہ خوب دھوپ لگنے اور موسم برسات کی بارش میں زمین اچھی طرح تیار ہو جائے۔ انہوں نے ہائبرڈ ٹی روز کیلئے پودے سے پودے کا فاصلہ دو سے اڑھائی فٹ رکھنے کی ضرورت پر بھی زور دیا۔